Nakatagamtam og uwan ang Metro Cebu kagahapon sa hapon, lapad-lapad nga bahin sa mga dagkong siyudad ang nauwanan ug daghan ang nagpasalamat niini.
Nadungog gyud ang Oratio Imperata sa Simbahang Romano Katoliko pinaagi sa mga Obispo niini nga nanawagan sa tanan sa paglitok sa maong orasyon nga pagpangayo og uwan gikan sa Kahitas-an ug pagpamenus sa nagkataas nga temperatura sa nasud dala aning El Niño Phenomenon.
Sa mga hugot nga magtutuo, tubag kini sa tim-os nga pag-ampo tungod kay daghan na ang nahasol niining grabeng kainit sa panahon ug nakaapektar na gani sa presyo sa mga palaliton ilabi na sa pagkaon tungod kay usa ang agrikultura ang nagrabehan.
Bisan tuod og dili pa gyud tantong kusog-kusog ang uwan kagahapon, nakatabang na kini pagpakunhod gamay sa kaalimuot sa palibot, nakabisbis sa mga tanaman ug nibugnaw ang palibot.
Ang pangutana karon, unsa may gihimo sa mga tawo pagpangandam sa umaabot nga mga katuigan aron dili na maingon niini kadako ang epekto matag dunay susama nga katalagman?
Naleksyon na ba ang tanan? Duna bay mga lakang nga gihimo aron mamenusan ang danyos?
Kinahanglan molihok sab ang tawo sama sa pagpananom og daghang mga kahoy, pagtuman sa mga balaod sa hustong paghipos sa mga basura, pagpamenus sa carbon imprint gikan aning mga makinarya, pagpatuman gyud sa mga balaod nga magpahunong sa polusyon ug daghan pang uban.
Dapat ang tanan motampo. Kining tampo nga buhaton sa mga henerasyon karon pangpamenus lang sa epekto ug dili pa paigo aron maalim ang pagkaangol sa kalikupan gikan sa pag-abusar sa mga nag-unang mga henerasyon nga nagpasagad.
Ang tanang buhaton ug gibuhat sa karon nga henerasyon para sa kalikupan karon, maayo man o dili, makaapektar sa umaabot nga mga henerasyon.