"Lupig sila"

Gibutyag sa Philippine Navy nga gawas sa mga Chinese research vessels nga nagpundo didto sa kadagatan sa Catanduanes, aduna pa’y tulo ka survey ships ang nakit-an didto sa Ayungin Shoal.  Nabatyagan nga aktibo ug agresibo ang Chinese Naval forces atol ni’ng pagpahigayon sa labing dako’ng Balikatan exercise. Kon ang hilom nga katuyoan sa Balikatan mao ang paghatag pasidaan sa China sa pwersa sa mahimong kaaway niini, mora’g wala gyud makab-ot kining maong katuyoan.  Hugot ug klaro ang China sa ilang katuyoan sa WPS.  Dili sama sa atong mga lider nga pulos lang pagarpar ug walay tataw nga plano kon unsaon pagpatigbabaw sa atong katungod ug soberiniya sa WPS.  Matud pa sa commercial sa usa ka FM radio station, “Lupig Sila”.  Fezteleern!

Katumanan ang kapakyasan

Namahayag si Speaker Martin Romualdez nga mopasaka og balaodnon ang kongreso nga mag-amendar sa Rice Tariffication Law (RTL) aron mahibalik sa National Food Authority (NFA) ang awtoridad sa pagpangompra sa bugas ingon man sa pagbaligya niini sa ubos nga presyo.   Tungod sa kamapahimuslanon sa mga negosyante, nunot sa pakigkunsabo sa mga opisyales sa gobyerno, wala makab-ot ang katuyoan Rice Tariffication Law.  Ni’ng maong kapakyas sa balaod, haum ang panultihon nga “Kon ang imong katuyoan ambisyoso ra kaayo, bisan ang kapakyasan matawag na nga katumanan”.   Muleeng!

Dili na unja-unjaon

Tungod sa panawagan nga ibalik na ang pagpahigayon sa daan nga school calendar tungod sa naglagiting nga kainit, misugyot na ang DepEd ngadto kang Presidente Marcos nga sugdan na ang umaabot nga school sa buwan sa Hunyo.  Dili na angayan nga maghiko-hiko pa ang kagamhanan sa pagpatuman niining maong laraw.  Dayag nga suportado kini sa daghan sektor sa katilingban lakip na ang mga magbabalaod.  Angayan nga ipa-implementar na kini kay matud pa bitaw sa linya sa kanta, “Kay kon unja-unjaon pa, mawala na’y gana”.  Saoonz!

Lawog sa baboy

Nakuhaan og video ang mayor ug ang bise mayor sa lungsod sa Tobias Fornier, Antique nga nag-away ug diriyot magsinumbagay tungod lang sa mga food packs nga ipanghatag unta sa mga residente nga apektado sa El Nino.  Buot sa bise mayor nga ipanghatag ang food packs ngadto sa wala pa makadawat og hinabang.  Apan matud sa mayor, wala masubay ang proseso sa pagpanghatag sa ayuda.   Kon dili maresolbar dayon ang panagbingkil sa duha ka nag-unang opisyal sa lungsod, basin baya mapan-os na hinoon ang mga pagkaon ug dili na mapahimuslan.  Inay pagkaon sa tawo, mahimong lawog sa baboy na hinoon ang mga food packs.  Madahaaan!

Moabot ra ang turno

Gikataho nga dili momenus sa pito (7) ka tawo ang naangol human maigo sa kilat nga mikadlit didto sa venue sa reception sa kasal didto sa Barangay Salaysay, Marilog, Davao City.  Dili matag-an ang dagmal sa kinaiyahan.  Sa mga nanga-angol, puno tingale sila sa pagmahay ngano nga mitambong pa sa reception sa kasal.  Sa mga wala maigo sa kilat, padayon lang ang pagsanong sa mga imbitasyon.  Moabot ra lage ang inyong turno nga kamo na pud ang maigo sa kilat.  Pagkatoytoy!