Kinsay modakop ni Digong?

Kinsa kaha ang makahimo pagdakop nila ni kanhi presidente Rodrigo Duterte, sa iyang anak nga si Vice President Sara Duterte ug ni Senador Ronald  Bato  Dela Rosa?

Mao kini ang dakong pangutana kon pananglit ang International Criminal Court (ICC) moisyu man gyud og warrant of arrest aron dakpon ang amahan ug anak, lakip na si Bato.

Nagtuo ko nga daghang sundalo ug polis ang pabiling miyukbo kang Duterte nga maoy nagpaumento sa ilang sweldo dihang diha pa kini sa katungdanan.

Nanaad si Duterte nga mosukol siya kon ang ICC mopadakop man gyud kaniya, kay matud ni Digong nga dili siya magpadakop nga buhi.

Hugot ang iyang baruganan nga way hurisdiksyon sa Pilipinas ang International Criminal Court (ICC) kay mibuwag na kini isip sakop kaniadtong Marso 17, 2019.

Ang International Criminal Court usa ka institusyon sa kalibotan nga gitahasan sa pag-imbestigar ug pagsilot sa makahimo og pagpamatay nga way basehanan.

Ang ICC gustong mohusay sa pasangil nga sila si Duterte ug kanhi PNP Chief Bato Dela Rosa daghan kuno og gipamatay nga  way sala.

Ang report nga nadawat sa ICC nagkanayon nga miabot og dul-an sa 4,000 ka tawo ang gipamatay atol sa administrasyon ni Duterte, apan matud ni Digong nga ang nangamatay nalambigit sa drugas.

Kon moisyu ang ICC og warrant of arrest, kinsa may mopatuman sa kamandoan pagdakop nilang Digong, Sara ug Bato? Ang kapolisan?

Tan-aw nako, mora g makuli nga makaako ang kapolisan ug militar sa pagdakop sa tawo nga maoy nakapausbaw sa ilang sweldo.

Ambot kon si Presidente Bongbong Marcos momando ba usab kaha nga dakpon si Digong. Bisan og nagkatinubagay sila karon sa media, apan mora g nagpugong lang usa si Bongbong.

Atol sa termino ni Duterte, halos tanang kampo sa kapolisan ug militar, iya gyud nga giadto ug gibisitahan ug matud pa mao ra y bugtong presidente nga nakahimo niini sukad-masukad.

Mao nga klaro kaayo nga gipangga sa mga polis ug kasundalohan si Duterte. Unya, dakpon kaha siya? Aw, kon mandoan man ang mga polis ug militar nga dakpon si Digong, nagtuo ko nga dunay iyang mga  diehard  nga anaa sa aktibong pwersa nga molaban kaniya.

Nagtuo ko nga mao kini ang giingon ni Digong nga dili siya magpadakop nga buhi, ug mosukol siya kay ang iyang baruganan way hurisdiksyon sa Pilipinas ang ICC.

Matud ni Digong ug ni Sara nga andam silang moatubang og kaso, apan dinhi lang sa mga korte sa Pilipinas, og dili didto sa International Criminal Court.