Maluluy-on tuod ang Dios apan….

Nahimong sentro sa panaglalis diha sa social media ang isyu kalabot sa kumpisal ug kalawat. Nga kun anaa ang usa ka tawo sa sala nga mortal dili maayo nga siya mokalawat sanglit ang maong pagkalawat imbis magdala og kaluwasan magdala man hinuon ug kalaglagan.

Unsay kalainan sa sala nga Mortal ug Venial? Ang sala nga mortal gikan sa pulong latin nga mortis nga nagpasabot og kamatayon o ikamatay. Nga sa ato pa, seryoso.

Samtang ang venial gaan gaan nga sala nga dili nga wala magpasabot nga ang hingtungdan madala sa kalaglagan. Apan kun atong pasagdan ang sala nga ginagmay apan nahimong naandan usa kini ka dakong suliran inig abot sa tumang panahon.

Subo palandungon nga ning atong kapanahonan karon daghan ang buot og compromise.

Modawat ug mosaulog sa mga sakramento bisan dili takus. Ang resulta niining maong pangangkon nga pwede ra gyud mokalawat bisan anaa sa sala nga mortal mao nga atong giabusaran ang kaayo sa Dios.

Atong sabton nga ang kumpisalan dili basurahan alang sa sala. Hinunoa, ang sakramento kasinatian sa grasya.

Ang tawo nga nikumpisal makadawat sa grasya sa kapasayloan labina kun iyang basulan ang iyang kasal-anan.

Dili kutob ra pud sa pagbasol mohimo pud siya og pag-ayo sa bisan unsang kadaut nga iyang nahimo.

Ang nausab nga kinabuhi maoy timaan sa tinud-anay nga paghinulsol. Atong hinumdoman nga ang simbahan dili labortatoryo sa mga teologo ang simbahan gipanag-iya ni Kristo.

Ang kaluwasan bisan tuod libre apan kun walay kitay himoon nan, halayo gihapon alang kanato ang kaluwasan.