Dipahibalo sa Land Transportation Office (LTO) niadtong adlaw nga Domingo nga pipila sa moabot sa 24 milyones ka mga sakyanan nga wala marehistro o delinquent gipanag-iya sa nagkalailaing ahensiya sa gobiyerno.
Ang hepe sa LTO nga si Assistant Secretary Atty. Vigor D. Mendoza II miingon nga sa 24.7 ka milyon nga mga dili rehistrado nga sakyanan, 65 porsiyento niini gipanag-iya sa gobiyerno nga nagdumili o tuyo nga wala moparehistro sa ilang mga sakyanan.
Si Mendoza mihangyo sa mga ahensiya sa gobyerno nga wala moparehistro o tuyo nga wala moparehistro sa ilang mga sakyanan sa pagparehistro sa ilang mga sakyanan.
Giklaro sa hepe sa LTO ang pagkamahinondanon sa pagparehistro sa mga sakyanan tungod kay ang mga dili rehistrado nga sakyanan hulga kini sa kaluwas sa dalan tungod kay posible nga wala kini makapasar sa road safety tests.
Gawas sa isyu sa ka luwas sa dalan, ang gobiyerno naalkanse usab og moabot sa P37 bilyones tungod sa wala marehistro nga mga sakyanan.
Gawas sa rehistro, daghan pod ko nakita nga sakyanan nga puwa ang plate number nga itom kaayo og aso nga klaro kaayo nga wala makapasar sa emission tests. Seguro kining maong mga sakyanan dili rehistrado o wala giparehistro tungod kay usa sa gikinahanglan sa pagparehistro sa sakyanan mao man ang emission test.
Tungod niini akong gihagit ang opisina ni Mendoza sa pagdakop sa mga driver ug pag impound sa mga sakyanan nga gipanag-iya sa nagkalain-laing ahensiya sa gobyerno nga dili rehistrado.
Ang kapakyas sa LTO sa pagdakop ug pag impound sa mga sakyanan nga iya sa gobiyerno nga dili rehistrado nakapawagtang kini sa iyang moral ascendancy sa pagdakop ug pag impound sa mga pribadong sakyanan nga dili rehistrado.
Kinahanglan nga ang gobiyerno mismo ang unang mosunod sa iyang mga patakaran dili kay maoy mag-una sa paglapas niini.