Di lang kausa kon dili kaduha na nasayop ang Philippine Atmospheric, Geophysical and Astronomical Services Administration (PAGASA) sa ilang pangagpas nga mosud na ang bagyong Kabayan sa Philippine Area of Responsibility (PAR):
· Una, nipasidaan sila nga ang low pressure area (LPA) gawas sa PAR sniadtong unang semana sa Oktubre posible nga mahimong bagyong Kabayan, pila ka adlaw human nigawas sa PAR ang kataposang bagyo nga si Jenny; ug
· Ikaduha, nipasidaan sila nga dunay LPA mahimo nang bagyo sa di pa mosud sa PAR ug nganlan og Kabayan sa niaging semana.
* * *
Ang LPA nga nakit-an sa PAGASA niadtong Oktubre nabungkag nga wa mahimong bagyo. Ang bag-ong LPA nga nagkaduol sa PAR nahimong bagyo niadtong Lunes pero nihuyang sa pagka LPA sa Martes ug niungot sa gawas sa PAR hangtod sa Biyernes.
Nakasud ang LPA sa PAR gahapon, Sabado, pero di kanganlan. Niangkon ang Pagasa nga gamay na lang ang kahigayonan nga mahimo siyang bagyo. Mobubo hinuon og daghang uwan sa Sugbo, Kabisay-an ug Mindanao. Kay nag-abot sa Kabisay-an ang LPA ug shear line (panagtagbo sa bugnaw ug init nga hangin).
* * *
Nikumpisal ang PAGASA nga lisod ang pagtakda sa sunod nga mahitabo sa LPA nga mahimo untang Kabayan. Kay katag ang mga panganod tungod sa kabugnaw sa palibot sa gawas sa PAR. Gipangagpas sa niaging semana nga mas maporma kon mosud na sa PAR kay mas mahigalaon ang palibot (mas init ang temperatura sa kadagatan).
Ang pagpabilin niyang LPA hangtod sa akong pagsuwat ini maayong balita para sa Kabisay-an ug Mindanao. Pero di makatabang sa credibility sa PAGASA.
* * *
Di hinuon monopoliya sa PAGASA ang kalisod pagbanabana sa panahon:
· Ang Bohol ug Talisay City nisuspenso sa klase niadtong Biyernes sa kabalaka nga magpadayon ang way hunong nga uwan sa Huwebes, pero puwerteng hayaga sa adlaw;
· Daghang nikanselar sa ilang kalihokan gahapon, Sabado, tungod sa pasidaan sa Pagasa nga 90% ang kahigayonan sa uwan, pero kadiyot rang uwan gahapon sa buntag; ug
· Dungan gyod sa pagtuang sa uwan sa among bukid sa Casili, Consolacion sa amihanang Sugbo ang pagtingog sa akong telepono sa pasidaan sa kusog nga uwan sa National Disaster Risk Reduction and Management Council (NDRRMC).
* * *