Ikanapulog-Siyam nga Adlaw

Pito ka mga Ulohang Sala: KASUKO Sukaranang Teksto

“Ang tawong kalma, maalamon. Apan ang dali rang masuko nagpaila sa iyang kabuang.” (Pan. 14;29)

Pasiuna

1.  Ang kasuko usa ka normal nga reaksiyon sa usa ka tawo ngadto sa panghitabo nga wala makahatag kaniya og pag-uyon sa usa ka binuhatan o sa mga tawo.

2.  Adunay duha ka matang sa kasuko, makaayo ug makadaut.

3. Ang kasuko mahimong tipigan, mahimong dumalahon.

Pagpalawom

1.  Dili sa tanang panahon mahimong uyonan nato ang mga buhat sa atong isigkaingon bisan pa man kun dili kita komportable kalabot niini. Ang kasuko mamahimong atong ipakita kun wala kita makauyon.

2. Ang kasuko mahimong makaayo kon kini makapadayag sa imong wala pag-uyon sa usa ka binuhatan ug pagpakgang niini aron dili na mausban. Apan buhata kin isa dili pintas nga paagi.

Sa laing bahin ang kasuko mamahimong makadaut labina kun nagpasulabi ang galamhan. Daghang mga kasuko nga nagdala og kamatayon.

3. Ang kasuko nga tinipigan kuyaw kun dili na kapugngan. Sama kini sa usa ka bomba nga nagpaabot lang kanus-a mobuto. Ang kasuko nga gidumala mamahimong mapadayag apan sa dili pintas nga paagi.

Pangamuyo

Ginoo, angkunon ko nga gumikan sa akong wala pagpugong sa akong kaugalingon, ako naulipon sa akong kasuko.

Hatagi ako sa usa ka mapamalandongong kasingkasing ug malinawong diwa aron masayud ako kanus-a ug sa unsang paagi akong mabuhian ang akong kahiubos, kanus-a ako makakat-on gikan niini ug sa grasya nga makasanong niini sa dili pintas nga paagi. Ikaw nga buhi ug hari hangtud sa kahangturan. Amen.

Sa Ngalan ni Kristo Jesus nga Nazaretnon! Pahawa Satanas! Ang demonyo sa Kasuko! Gikan sa akong kinabuhi! (litokon sa makatulong higayon)

Kalihukan karong Adlawa

Ilista ang mga hinungdan kun nganong masuko ka ug sa unsang paagi nimo kini pakigbatokan.