EDITORYAL - Chinese fishing boats modagsa

Kinahanglang pangandaman og maayo sa Philippine Coastguard (PCG), Bureau of Fisheries and Aquatic Resources (BFAR) ug ingon man sa Philippine Navy kining paglibkas na sa China sa kaugalingon niining gipatumang fishing ban sa South China Sea apil niini ang West Philippine Sea.

Kini tungod kay sigurado gyud nga modagsa nasab ang gatosan ka mga Chinese fishing boats uban sa gatosan sab ka mga militiaboats niini nga magpakaaron-ingnong panagatan diha sa WPS.

Niadtong Hunyo nagsugod ang fishing ban nga gipatuman sa China sa South China Sea, nagpasabot kini nga bisan ilang panagatan dili pwedeng managat sa maong lugar.

Mao tingaling dili sama sa nanglabay nga mga buwan nga namungingi sa ilang mga panagatan ang pipila ka mga bahura sa WPS,  apan sukad sa bulan sa Hunyo ang mga militiaboats nalang maoy nagbahis-bahis.

Sigurado mausab kini sa mosunod nga mga adlaw kay niadtong Agosto 15 gilibkas sa China ang ban.

Kaning ilang mga panagatan kuyogan kini sa ilang militiaboats ug Chinese Coastguard aron sila panalipdan.

Dili parehas sa PCG nga ubos sa Department of Transportation, ang CCG ubos kini sa People s Republic of China Army-Navy (PLA-N) nga mao sab ang nagkontrol sa mga militiaboats nga kabahin sa ilang gipatumang  grey tactics.

Ilegal ang pagpatuman sa China sa fishing ban kay dili ilaha ang WPS, apan wala nila kini tahura.

Husto lang pud nga wala kini ilha sa Pilipinas kay walay katungod ang China paginsister sa ilang balaod sa dili ilahang lugar. Bisan gani wala pa ang fishing ban, gisigehan na og hasi sa China ang mga mananagat nga Pilipino sa kadagatan sa WPS.

Ang dakong hagit karon sa PCG ug BFAR kun mapugngan ba nila ang daghang modagsa nga Chinese fishing boats nga modagsa unya sa WPS, ilabi na nga magpanon gyud kini kauban ang militiaboats ug CCG.

Maimplimentar ba kaha sa PCG ug BFAR ang Fishery Law of the Philippines batok sa mga Chinese nga sigurado man nga dili sila mag-inusara ini og panagat, kanunay naa sa duol ang militiaboats ug CCG.