Intelligent apan confidential

Gikahingawa ni Senador JV Ejercito ang nagkadaghan nga hangyo sa confidential ug intelligence funds (CIF) sa mga ahensiya sa kagamhanan nga naapil sa umaabot 2024 budget.  Midugang hinoon ang senador nga makatarungangon ang CIF nga budget sa uban’g ahensiya.  Potensyal nga tinubdan sa kurapsyon ang CIF tungod sa kalugak sa audit rules alang niini.  Ni’ng kahimtanga, basin baya sakto ang literal nga pagsabot sa akong amigo nga “modaghan na unta ang mga “intelligent” sa gobiyerno kay gigahinan na man kini’g pundo, apan dili gihapon nato sila mapuslan kay “confidential” man.  Fezteleern!

Nakuha ang dili gusto

Nahunong ang negosasyon tali sa Cebu City Hall ug MCWD kabahin sa paggamit sa nahauna sa edipisyo nga gipanag-iya sa MCWD tungod sa kadako sa gintang sa binulan nga abangan nga buot ipatuman ug hangpon sa matag habig.  Buot sa MCWD nga mo-abang ang dakbayan sa Sugbo og 700 mil ka pesos matag bulan, apan 200 mil ka pesos ra ang sugyot sa dakbayan.  Gituohan nga adunay panagsabot nga makab-ot labi pa kay gigamit na sa dakbayan ang edipisyo.  Pagatawgon unya ang makab-ot nga kasabutan nga “kompromiso” (compromise) tungod kay makuha man sa matag habig ang butang o kahimtang nga dili maoy ilang gusto.  Madahaan!

Walay pili, apil tanan

Wala mahingpit ang pagpatuman ang City Ordinance 2343, nga nagdili sa paggamit sa plastic shopping bags sa pili nga mga adlaw matag semana tungod sa giingon nga “buslot” sa maong balaod.   Segun sa definition of terms nga nalatid sa ordinansa, ang plastic bag lang nga adunay kuptanan ang gidili nga magamit. Wala malangkob niini ang plastic bag nga walay kuptanan.  Makapahinumdum sa estorya sa tigulang nga babaye nga nasuko kay mihangyo ang iyang apo  nga dili apilon sa mga tulisan pagpanamastamas ang ilang lola.  Masuk-anon nga miingon ang Lola nga, “Kon moingon ang tulisan nga “tanan”, aaw, tanan gyud. Ayaw pagbuot.” Pagkatoytoy!

Lupig sila

Sa mensahe nga giluwatan ni PNP Chief Benjamin Acorda, Jr. atol sa pagbukas sa Armscor Tactical, Survival and Arms Expo, kinahanglan nga moambas usab ang law enforcement sa bag-ong teknolohiya nunot sa padayon nga pag-usab sa kalibutan.  Husto ang pamahayag sa PNP Chief.  Migamit na bag-ong teknolohiya ang mga dautan’g elemento sa paghimo’g krimen, busa labaw’ng kinahanglan mogamit usab niini ang atong kapolisan.  Kay kon dili mo-upgrade sa bag-ong teknolohiya ang PNP, angay lang gyud sila si-abon ug kantyawan nga “Lupig Sila.” Fishkots!

Dili haum ang silot

Gikataho nga usa ka suspetsado’ng kawatan ang namatay human mahulog gikan sa 3rd floor sa usa ka edipisyo didto sa Atimonan, Quezon.  Segun sa imbestigasyon, naglaraw unta ang biktima nga mangawat sa maong edipisyo apan disgrasya nga nahulog sa fire exit.  Wala mahulog sa kamot sa balaod ang maong suspetsadong kawatan, hinonoa, didto siya mahulog sa kamot ni Kamatayon.  Kay wala man madayon ang laraw sa biktima nga pagpangawat, daw wala mahaum ni’ng kahimtanga ang panultihon nga “Matag krimen adunay angayan ug haum nga silot.” Saoonz!