Sayo nga pagbuntis

Gitug-an sa Population Commission sa Rehiyon 7 nga adunay duha ka barangay sa dakbayan sa Sugbo nga taas ang kaso sa teenage pregnancy sa tuig 2022.

Ang population program officer sa Population Commission 7 nga si Maria Lourdes Garillos miila sa duha ka barangay nga mao ang Inayawan ug Mambaling.

Dugang ni Garillos nga adunay mga kaso usab sa teenage pregnancy sa ubang mga barangay sa dakbayan sa Sugbo apan sa 80 ka barangay niini ang Inayawan ug Mambaling ang adunay pinakadaghan og kaso.

Si Garillos miingon nga sa mga Highly Urbanized City sa tunga-tungang Visayas ang dakbayan sa Sugbo mao ang may pinakataas ang kaso sa teenage pregnancy. Ang pinakabata nga nabuntis 10 anyos.

Gitumbok ni Garillos ang kakuwang sa kasayoran sa sex education ug adolescent reproductive health ang hinungdan sa sayo nga pagbuntis sa mga batan-on.

Basi sa National Demographic and Health Survey (NDHS) sa tuig 2022 nga gipagawas sa PSA-7 niadtong Hulyo 13, 2023, ang tunga-tungang Visayas adunay walo ka milyon nga populasyon ug niining maong gidaghanon 2, 062, 682 ang mga babaye nga anaa sa reproductive nga edad.

Ang NDHS 2022 nga datus nagpakita nga 5 porsiyento sa mga babaye nga nag edad og 15-19 sa tuga-tungang Visayas buntis. Sa 2021 nga datus nga gipresentar ni Gabrillos niadtong Hulyo 13, 2023 miabot ngadto sa 10,717 ka mga batan-on nga nag edad 15-19 ang nabuntis samtang adunay 164 nga nabuntis nga ubos sa 15 anyos. Sa kinatibok-an miabot sa 10,881 ang mga batan-on nga nabuntis sa tuig 2021.

Ning maong gidaghanon, ang dakbayan sa Sugbo adunay 1,628, Lapu-lapu, 504; Mandaue, 613; Bohol, 1,514; Negros Oriental, 2,226 ug Siquijor nga adunay 116.

Ang pangsanta nga programa nga gihimo sa PopCom mao ang teen center ug educators training alang sa adolescent. Gidasig usab niini ang pag-establisar og mga sentro diin makasalmot ang mga batan-on. Nakig-uban usab ang PopCom sa National Youth Commission ug Sangguninag Kabataan aron I-adbokasiya niini ang pagpahibawo sa teenage pregnancy.

Samtang makatabang kining maong mga programa, mas maayo nga tutokan ug palig-onon sa PopCom ang papel sa mga ginikanan sa pagpaminos sa kaso sa sayo nga pagbuntis.