Pagtudlo ug pagdupa ni Gadon
Niinsistir si Presidente Ferdinand Marcos Jr. nga ipabilin sa puwesto si Atty. Larry Gadon isip presidential adviser on poverty alleviation bisan gi-disbar siya sa Korte Suprema. Nagkahiusa ang 15 ka mahistrado nga nagpakauwaw si Gadon sa propesyon human niya gimaldisyon ug giawhag ang babayeng peryodista nga si Raissa Robles nga makighilawas og iro.
Unsa may mensahe ni Marcos sa pagtudlo ni Gadon? Nga premyohan sa administrasyon ang magbinastos batok ni Robles ug sa ubang nangahas sa pagsaway sa iyang pagdumili pagbayad sa P203.8 bilyones nga utang sa estate tax?
* * *
Laing paukyab ni Gadon mao ang iyang hudlat nga patyon ang tanang Muslim sa Mindanao, apil nang mga bata, mga inahan ug mga ilaga, sunugon ang ilang mga moske ug kabalayan ug puohon ang ilang kaliwat.
Giduphan sa Malakanyang si Gadon bisan sa iyang disbarment samtang nagsaulog ang nasud sa Eid’l Adha, usa sa labing importante nga kalibotanong holiday sa mga Muslim. Mao bay mensahe ni Marcos Jr. nga, sama sa iyang amahan, gubat patani batok sa mga Muslim ang yawe sa kalinaw ug sulbad sa kakabos sa Mindanao?
* * *
Laing panginsulto ni Gadon mao ang iyang pagtawag nga bugo ang mga lider ug mga dumadapig sa oposisyon ug ang brayt mao ra ang taga administrasyon. Brayt gyod tingali ning administrasyona kay maglisod na mang mga konsumidor pagkab-ot sa presyo sa inadlawng palaliton.
Unsa may mensahe sa pagtudlo ni Marcos kang Gadon? Nga gidasig sa administrasyon ang pag-insulto sa mga mobuyag sa mga lakang sa iyang administrasyon nga giisip nga makaayo sa iyang mga suod pero makadaot sa kinabag-an?
* * *
Laing fake news ni Gadon mao nga HIV ang namatyan ni anhing Presidente Noynoy Aquino niadtong 2021. Namatay si Aquino sa iyang sakit sa kidney. Nagpaabot sa iyang turno sa taas nga listahan sa mga nagkinahanglan og kidney transplant bisan mahimo untang lakturon ginamit ang iyang posisyon.
Unsay mensahe ni Marcos sa pagtudlo ni Gadon? Nga mga Aquino ang sad-an sa ilang paglayas sa Malakanyang niadtong 1986? Nga wa pa siyang kadawat hangtod karon nga ang EDSA People Power Revolution niulbo kay wa nang kaagwanta ang katawhan sa pangabuso ug pangurakot sa diktadura sa iyang amahan?
* * *
- Latest
