Siyensiya batok pataka
Ang Sugbo mas unang natakdan sa African Swine Fever (ASF) kay sa Negros Oriental. Mao untay makagiya sa silingang probinsiya unsaon pagbadlong ang pagkatap sa kagaw. Pero ang pipila ka politiko sa Sugbo nipili sa pagkiha ug paghudlat sa Bureau of Animal Industry (BAI) ug pagtago unsa na kalapad ang tinakdanay.
Ang Negros Oriental nilikay sa tanang pataka sa Sugbo. Gigakos nilang siyensiya. Gisunod ang ASF protocols. Mao nga samtang 12 na ka syudad ug lungsod sa Sugbo ang nasudlan, nalimitahan ang mga kaso sa Negros Oriental sa tulo ka barangay.
* * *
Sa wa pa sugoa sa Kapitolyo sa Sugbo nga dakpon ang taga BAI nga mohimo og ASF tests, may kumpirmado nang ASF cases ang mosunod nga mga lugar: Bogo City, Carcar City, Cebu City, Cordova, Lapu-Lapu City, Liloan, Mandaue City, Minglanilla, San Fernando, Sibonga, Talisay City ug Tuburan.
Way bag-ong kasayuran nga gipagawas ang BAI sa ASF cases sa Sugbo. Bugtong nakuha sa mga Sugboanon mao ang pasalig sa provincial veterinarian (nga gipasanginlang nitago sa unang mga kaso sa Nobyembre 2022) nga way baboy nga namatay sa ASF.
* * *
Kontrolado ang pagkatap sa ASF sa Negros Oriental tungod sa ilang pagtuman sa mga giya ug pagpatabang sa BAI:
• Gipatay dayon ang kapin 700 ka baboy nga nahimutang sud sa 500 ka metros nga radius sa mga natakdan sa ASF; ug
• Ginganlan ang naigo nga tulo ka barangay (Maayong Tubig sa Dauin, Tubtubon sa Sibulan ug Cadawinonan sa Dumaguete City) maong nakatabang ang publiko pagpugong sa pagsud-gawas sa mga baboy aron di matakdang kasilinganan.
* * *
Nipagawas dayon si Negros Oriental Governor Manuel Sagarbarria og P53 milyones ug 150 ka sakong bugas nga hinabang sa apektadong mga mamuhiay og baboy. Maong imbes tagoan ug ipayuhot pagbaligya, nitabang ang mga hingtungdan sa pagpatambal dayon sa nangasakit nilang mga baboy.
Duha ka isla. Duha ka managlahing alkontra sa ASF. Ang usa nituman sa mga paagi nga napamatud-an nga labing epektibo pagbadlong sa kagaw sa ubang bahin sa Pilipinas ug sa ubang kanasuran sa kalibotan. Ang ikaduha nipili sa pagpanggukod sa BAI ug paglalis sa ASF protocols. Duna na tay ideya kinsa nila ang unang makalingkawas sa katalagman.
* * *
- Latest
