EDITORYAL - Nganong naay kolurom nga habal-habal

Usa ka maayong lakang ang gihimo sa siyudad sa Sugbu pinaagi ni Mayor Michael Rama pag-ila sa habal-habal nga usa ka matang sa alternatibong transportasyon.

Dili naman kini bag-o, hagbay ra man gyud ang pagpamasahero gamit ang single nga motorsiklo kaniadto nga nagsugod sa mga bukirang barangay nga di masudlan og mga pasaheroan. Apan kaniadto gikonsiderar nga ilegal kini nga matang sa public conveyance sa  Traffic Code of the Philippines, apan gumikan sa kakuwang gyud sa alternatibong transportasyon gawas lang sa tradisyonal nga mga jeepneys, bus, ug rail system nga didto ra sa Metro Manila, milanog ang panawagan nga tugotan ang habal-habal. Tuod man, unsa may ayo sa gobiyerno ug sa mga magbabalaod kun dili sila makamaong maminaw sa lanog nga panawagan sa katawhan nga sa pagkatinuod sila man sab ang nagkulang nganong nabiyaan og maayo ang sistema sa public transport sa Pilipinas kun itandi sa mga silingang mga nasud dinhi sa Asya.

Gitugotan na nga gamiton ang single nga motorsiklo aron mamasahero, apan nangsulpot sab nga murag mga uhong kaning mga ride hailing apps sama sa Angkas, Grab, JoyRide, Maxim ug daghan pang uban.

Mas nahimong moderno, regulated ug angkunon man o dili, mas luwas silang sakyan kun itandi sa tradisyonal nga habal-habal.  Tungod kay dunay rekord kinsa ang drayber, motorsiklo, oras ug ang destinasyon sa rota nga masubay kun magkinaunsa, labaw sa tanan, di makapatuyang sa pletihan. Si Rama mimando sa pagumol og buhatan nga maoy moatiman sa mga habal-habal, kini aron mahimo silang legal ug may kasigurohan ang mga sumasakay.

Maayo usab tingaling sutaon sa mayor pinaagi aning Habal-habal Office  kun unsay rason kun nganong bisan og duna nay mga nagkalainlaing app hailing rides nga pwedeng ma-aplayan duna pa gihapoy mga kolurom nga habal-habal nga nagdagan.

Posibleng mao ra gihapon unya ang ilang rason nganong dili sab unya sila magpasakop aning Habal-habal office. Kun mahitabo kini, mawala sab ang tumong nganong gitukod ang maong opisina.

Kinahanglang angkunon una nga bisan did-an kining mga habal-habal nga dili rehistrado, duna gyud gihapoy mosugal pamasahero ug aning paagiha, duna gihapoy pasaherong mabutang sa peligro.