Siyensiya sa Aklan, pataka sa Sugbo
Human gipahibawo sa Bureau of Animal Industry (BAI) ug sa Department of Agriculture (DA) nga natakdan na ang ilang mga baboy sa African Swine Fever (ASF), gipaubos sa Sangguniang Panlalawigan ang tibuok probinsya sa state of calamity. Aron mas epektibong matubag ang katalagman.
Masulub-on ming mopahibawo nimo nga wa ni mahitabo sa Sugbo. Kon dili sa Aklan sa kasadpang Kabisay-an. Kansang mga opisyal nidangop sa siyensiya sa pagbadlong sa tinakdanay. Lahi sa mga politiko sa Sugbo nga nisalibay sa siyensiya. Ug nagbuotbuot paghimo og ilang kaugalingong lagda.
* * *
Mga opisyal sa Aklan nituman sa ASF protocols. Gipatay ang tanang baboy nga nahimutang sud sa 500 ka metro nga radius sa mga natakdan sa ASF. Ug gibayran ang mga tag-iya sa mga baboy nga gipatay.
Sukwahi ang gihimo sa mga politiko sa Sugbo. Gidili ang pagpatay sa mga baboy. Gilalis ang confirmation sa BAI laboratory sa ASF. Gideklarar nga cholera ray namatyan. Gikiha ang mga opisyal sa BAI. Gidid-an sa pagkolekta og blood samples sa mga baboy. Wa tagda ang tiyabaw sa mga mag-uuma. Nga sunudsunod nang nangamatay ang ilang mga baboy.
* * *
Wa ra kumingking sa mas una ug mas daghang kaso sa ASF sa Sugbo ang mga kaso sa Aklan nga unang nabantayan sa Abril karong tuiga. Sa pagdeklarar sa Aklan og state of calamity niadtong Biyernes, pito ka lungsod ang naapektahan ug 40 ka baboy ang napatay.
Suma sa lista sa Regional Animal Disease Diagnostic Laboratory (RADDL) sa BAI nga gibutyag ni Cebu City Veterinarian Dr. Alice Utlang, unang nabantayan ang ASF sa Vito, Minglanilla niadtong Nobyembre 16, 2022. Nikatap dayon sa Talisay City, Cebu City, Lapu-Lapu City, Mandaue City, Cordova, Carcar City, San Fernando, Liloan, Tuburan, Sibonga ug Bogo City.
* * *
Wa rab sa kumingking ang babuyan sa Aklan (populasyon: 615,475) sa P11 bilyones nga industriya sa baboy sa Sugbo (populasyon: 3,325,385). Atong mahibaw-an sa mosunod nga mga adlaw unsay mopatigbabaw: Ang siyensiya ba sa Aklan; o ang pataka sa mga politiko sa Sugbo.
Mas takos untang mogiya nato silang Dr. Utlang ug kadagkoan sa BAI. Pero pinugngan ang ilang sulti. Tungod sa hulga sa posas sa Kapitolyo.
* * *
- Latest
