Dakong challenge sa kabomberohan

Human sa dakong sunog nga mikaylap sa usa ka highrise building kaniadtong Biyernes, panahon na nga i-modernize sa kagamhanan ang opisina sa Bureau of Fire Protection dinhi sa dakbayan sa Sugbo.

Naglisod intawon ang mga sakop sa BFP sa siyudad sa ilang kumbati batok sa sunog tungod kay didto kini miulbo sa labing taas nga bahin sa 38 ka andana nga building nga kasamtangang gitukod sa Barangay Kasambagan.

Adunay aerial ladder ang kabomberohan sa dakbayan. Apan kutob lamang kini sa ika-18 ka andana. Mao nang lisod nila ang pagkatkat ngadto sa roof deck aron pagpalong sa nagdilaab nga kalayo.

Mao usab kini ang nakita nga kakulangon ni Mayor Michael Rama, kinsa nagsud-ong sa taas nga panahong pagkumbati sa mga sakop sa BFP batok sa maong sunog nga mikabat ngadto sa lima ka oras.

Matud niya nga iyang paningkamotan nga ma-modernize ang kahimanan sa kabomberohan sa dakbayan. Kini ilabina sa dakong kampanya sa siyudad nga mahisama sa Singapore sa natad sa ekonomikanhong kalamboan.

Karong adlawa o semanaha, gikatakda nga makigtigum si Rama sa mga hingtungdang ahensiya sa dakbayan ug sa pribadong sektor aron hisgotan ang mga problema sa kabomberohan sa dakbayan.

Angay lamang nga hatagan og dakong pagtagad ang estado sa BFP sa siyudad, kon unsa may kakulangon niini sa pagresponde sa sunog. Hinuon dili ikalimod nga nihit sa insaktong kahimanan ang maong ahensiya.

Sa dakong kalamboan nga misakdap sa dakbayan sa Sugbo sukad sa nakalabay nga katuigan, atong nasaksihan ang pagkuyanap sa daghang tag-as nga mga edipisyo. Ug usa kini ka dakong challenge sa atong kabomberohan sa ilang kaandam batok sa sunog