Kinsay masunod?

Human gitinuod sa kagamhanan sa probinsiya sa Sugbo pagkiha ang Bureau of Animal Industry kalabot sa isyu sa African Swine Flu, mora’g gisigengsigeng ang Kapitolyo tungod sa pagkatap na hinuon sa ASF sa ubang lugar sa lalawigan.

Basi sa ulahi nga taho sa BAI, nagkadaghan na hinuon ang mga lugar sa probinsiya sa Sugbo nga napamatud-an nga adunay presensiya sa ASF. Kini human sa siyudad sa Carcar diin unang madiskitahan ang maong virus sa baboy.

Sa gipagawas nga ASF Zoning Status sa BAI, ang mga siyudad sa Cebu, Mandaue, Lapu-Lapu, Talisay, Carcar ug Bogo, ug mga lungsod sa Cordova, Liloan, Minglanilla, San Fernando, Sibonga ug Tuburan ang nataptan karon sa ASF.

Hinuon, kon ang BAI lamang ang masunod, gusto niini nga i-huwis de kutsilyo kadtong mga baboy nga nataptan sa ASF ug kadtong mga anaa sa kasikbit nga tangkal sulod sa 500 metros. Kini isip pagpugong sa pagkatap sa maong virus.

Apan grabe nga nakarebenta ang administrasyon ni Gobernadora Gwendolyn Garcia batok sa maong paagi sa BAI. Kay lagi makulban kuno ang mga negosyante sa baboy ug mosukarap unya ang P11 bilyones nga hog industry sa probinsiya.

Ug tulin usab si Gobernadora Garcia nga midangop ngadto sa Ombudsman aron pagkiha sa mga kadagkoan sa BAI tungod sa dili kuno makiangayon nga pag-culling o pagpatay sa mga baboy sa lalawigan nga klaro kunong makapapiang sa local hog industry.

Niining maong kalamboan, makapangutana lamang kita kon kinsa ba gyud ang angay nga masunod. Ang Kapitolyo ba nga adunay hurisdiksiyon sa lokal nga kalihokan o ang BAI nga adunay katungod pagpatuman sa mga national politicies.

Bugtong ang korte lamang ang makatubag niini. Sa laing bahin, kay mohunong na man ang mga pagpatay sa mga baboy nga adunay ASF, gikabalak-an nga mas mokatap na hinuon ang maong sakit sa ubang lugar sa probinsiya.