Babaye, anaa imong anak

Pagdagmal batok panalipod. Mao kini ang tukmang hulagway nga gipakita niining panag-engkuwentro sa mga opisyal sa Bureau of Animal Industry (BAI) ug ni Cebu Governor Gwendolyn ‘Gwen’ Garcia bahin sa tukmang paagi unsaon pagsumpo sa African Swine Fever (ASF) nga miabot na dinhi sa Sugbo.

Ang BAI gustong otomatik pamatyon ang mga baboyng nahisulod sa 500 radius area nga dunay nataptag ASF bisan kini himsog pag panglawas. Samtang si Gob. Gwen hugot mibarog-supak, sanglit may nakit-ang  kakulangan sa maong paagi.

Gumikan ning ilang panagsumpaki ug pagpakita sa BAI sa ilang kahawod, gikiha sila sa probinsiya sa Sugbo og kasong administratiba base sa Republic Act 3019 sa Section 3(e): Anti-Graft and Corrupt Practices Act. Ingon niini kaisog-kamapanalipdanong inahan si Gob. Gwen. Nahisama sa usa ka himongaang walay kukahadlok molabok sa bitin nga gustong motukob sa iyang mga piso aron lamang silang iyang gimahal, maluwas.

Itaas sa krus, samtang masulob-ong misaksi si Birhen Maria, sa himalatyon niyang anak, si Hesus miingon: “Babaye, anaa imong anak.”

Ikatulo sa kataposan Niyang 7 ka pulong nga nanugon ni Birhen Maria nga paalimahan dili lang si Pedro, Magdalena ug ubang nanambong. Kondili, tanang katawhan gayod sa tibuok kalibotan. Paamumahan, sama sa iyang inahanong pag-amuma ni Hesus.

Unya, ngadto usab nila ni Pedro, Magdalena ug sa nanag-alirong, Siya mituaw: “Anak, anaa ang imong inahan.” Laing panugon nga Iyang gibilin sa katawhan. Diin nag-awhag, kanatong tanan, nga isip mga anak ni Birhen Maria, ato siyang tahoron. Ug usab, ang atong mga inahan.

Walay inahang sama ni Mama Mary nga magtudlog buhat nga makadaot sa anak. Busa, angay tumanon unsay isugo sa inahan. Kay makaayo man kini kanato.

Apan mirespeto ba ang BAI sa nahuptang katungod sa atong inahan sa Sugbo?

Kini bayang gibuhat ni Gob. Gwen nakapunting sa kaayohan sa tanan. Dili siya buot may makahimog daotan. Busa, nangitag paaging mapugngan kini. Makahugaw sa tanlag ang makamugnag daotan. Ug makapahalangit ang pagmintinar og limpiyong kalag. Dili ba, dalayegon man kining iyang gibuhat?

Busa, sa mga walay pagtahod niining sobra ka manggihunahunaong inahan, ning atong pagyukbo sa Semana Santa, pamalandongi kining gipanugon-tuaw ni Hesus: “Babaye, anaa imong anak. Anak anaa imong inahan!”