Shabu butanga’g hilo

Bisan unsa na lay pamaagi nga gipatuman sa atong kagamhanan sa pamasin nga masumpo na ang pagpayuhot og mga ilegal nga drugas.

Atol sa administrasyon ni kanhi presidente Rodrigo Duterte gihingusgan ang gitawag og Oplan Tukhang, gipangpatay ang mga tawo nga nalambigit sa ilegal nga drugas.

Dunay mga mayor, ug uban pa nga dagkong mga opisyal sa kagamhanan nga gipangtiklo sa wa hiilhing mga tawo nga gituohan nga mga kabahin sa nagpahigayon sa Oplan Tukhang.

Apan sukwahi sa gituohan nga mangahadlok ang mga tawo nga nalambigit sa pagpayuhot sa ilegal nga drugas, misamot man hinuon kadagko sa kantidad sa shabu nga ipalusot.

Sayonan ka nga kaniadtong Martes, ang kapolisan didto sa Northern Samar nakasakmit og 10 ka kilong shabu nga kantidad og P69 milyones. Nadakpan ang nagdala niini.

Unya, kaniadto gihapong miaging adlaw, usa ka South African national nasakmitan sab og 17 kilos nga shabu nga ang prisyo moabot og P120 milyones.

Kana ang nasakpan lang, way labot sa mga napayuhot nga wa masakpi sa mga tinugyanan sa balaod. Nganong wa man gyud sila mangahadlok?

Kay nakabantay man sila nga adunay mga grupo nga molaban dayon kon ang atong kapolisan makapatay og mga tawo nga nalambigit sa drugas ug gipatoo nga sila mga biktima ra.

Usahay bitaw, dili nako kalikayan nga makahunahuna nga ang labing epektibong paagi tingali mao nga ang kagamhanan motuyo sa pagpalusot og shabu nga gisagolan og hilo.

Sa ingon nga paagi, kadtong mogamit niini mangamatay. Ang mga tawo nga migamit og shabu may mga kabuot na sila sa wa pa sila mangayabag.

Ang pangutana, nganong migamit man gyud sila nga nasayod man sila nga makapabuang ug makapayabag ang paggamit og shabu?

Angay ba gud kaloy-on kining mga tawhana? Kon ang usa ka tawo mangayabag na og kawad-an na sa maayong panghunahuna tungod sa paggamit og shabu, mohimo na sila bisan unsa kay wa na sila sa maayong kabuot.

Mahimong mopatay og tawo, manglugos og kababayen-an, manulis aron may ikapalit sila’g drugas. Kon may mga adis-adis na nga mangamatay kay nakagamit og shabu nga gisagolan og hilo, tingali mangahadlok na ang uban nga mogamit.

Bisan giunsa nato nga adunay mga programa ang kagamhanan nga pabalikon sa pagsubay sa matarong dalan sa kinabuhi ang maong mga addict, ang mga pushers, apan wa gyud kini magmalampuson.

Ilabi na nga giundang ang pagpatuman og death penalty sa mga makahimo og bangis nga krimen, apil ang pagpayuhot og  ilegal nga drugas.

Bi, hinuktuki kuno ninyo pag-ayo kon unsay inyong ikasulti pananglit nga moabot ang panahon nga kamo ang mabiktima niining mga tawo nga naulipon na sa drugas.