Hain  ang kwentada?

Mapasigarbohon ug mapasalamaton si Cebu City Mayor Michael Rama sa resulta sa Sinulog Grand Parade niadtong Dominggo. Luyo sa daghang kahingawa ug kabalaka tungod sa dinali-dali nga pagpangandam, nagmalumposon ug way dagkong mga panghitabo nga nakabalda sa selebrasyon.

Nahuman ang grand parade nga malinawon ug way dautang mga panghitabo gawas sa pipila ka mga kaso sa nakuyapan tungod sa grabing kainit didto sa South Road Properties (SRP) ug bagulbol sa ubang mga nakapalit og ticket tungod sa dili maayo nilang pagkabutang didto sa grandstand.

Matud sa mga nagbagulbol nga labihang inita tungod kay way atop ang ilang nahimutangan ug dili sila makakita og tarong tungod kay level sa yuta ang ilang gilingkuran. Diha poy mga kaso sa kawat nga normal nga mahitabo matag Sinulog.

Medyo dako hinuon ang nahimong problema sa trapiko niadtong Domingo tungod kay ang tanang mga sakyanan gikan sa habagatang Sugbo nagpunsisok sa Natalio Bacalso Avenue sanglit sirado man ang SRP. Naobserbahan sa kadaghanan nga medyo dunay pagkuwang sa plano unsaon pagdumala ang bul-og sa trapiko atol sa maong higayon.

* * *

Karon nga human na ug malampuson ang kalihukan, usa ka butang ang nahabilin nga angayang buhaton nilang Mayor Michael Rama ug mga opisyal nga nagpasiugda sa kalihokan---hatagan og husay ang publiko sa gasto sa gobiyerno.

Hangtud karon dili makahatag og kwentada ang mga opisyal sa dakbayan pilay kinatibuk-ang nagasto sa syudad sa pag-abuno ug pagpatukod sa grandstand didto sa SRP alang sa Sinulog niadtong Domingo. Matud sa mga reporter sa The Freeman ug Banat News nga akong giawhag pagsusi pilay kinatibuk-ang nagasto sa syudad, way usa nilang Rama, Konsehal Jerry Guardo ug Philip Zafra ang makahatag og direktang tubag bisan bana-bana lang.

Ang tubag sa mga opisyal ila pa nga gikwenta pilay ilang nagasto. Ambot nganong ingon ini kalisod alang nila ang paghatag og kwentada?

Sa nangaging mga Sinulog didto sa Cebu City Sports Center, makahatag man dayon og tubag silang kanhi Sinulog Foundation Incorporated (SFI) executive director Ricky Ballesteros kun imong pangutan-on pilay gasto sa pagpatukod sa entablado.

Dili man gud kinahanglan nga ihikyad diha-diha ang tanang resibo sa nagasto, apan syaro og wala sila masayod pilay ilang budget sa maong proyekto?