Subay sa ngil-ad panghitabo

Nagsugod ang tanan sa Leila de Lima hostage drama. Sa short video nga gipasalida sa usa ka You Tuber, nakita ang duha ka polis sulod sa Camp Crame nga ordinariyo rang mga lihok, kinsa nagpahibaw-anay sa usag-usa nga atua, patay na kuno ang tulo ka inmate apil ang mi-hostage ni Leila.

Mubo ra ang video footage.  Ang makapahasol, nganong ang hostage taker, kinsa midul-it sa gigunitang kutsilyo ngadto sa liog ni Leila ang napatay sa miresponding polis samtang ang kanhi senadora nga napriso tungod sa pagka-drug protector, bisan gamay, walay tatsa?

Wala moklik ang Leila hostage drama. Giyam-iran sa nagpakabanang katawhan. Unya maoy misunod ang pagbuto sa balita bahin sa pagkasikop sa anak ni Justice Secretary Boying Remulla nga nadakpang naghupot og bags sa imported nga marijuana, sa usa ka buy-bust operation nga gipahigayon sa PDEA.

Daghan ang nakurat. Siyarog wala gyod masayod si Buying ning ilegal nga kalihokan sa iyang anak? Amahan god siya. Hinungdan, nga out of delicadeza, nanawagan ang katawhan nga paresayinon si Boying sa iyang puwesto. Pero isog kaayog ginhawaan. Nagpabilin gyod.

Unya, misunod ang kontrobersiyal nga pagkamatay sa hard-hitting radio commentator Percy Lapid, diin ang mamumunong misurender, Joel Escorial, maoy gihimong alas ni DILG Secretary Abalos ug Justice Secretary Remulla aron tabangag duot si suspendidong Bucor Chief Director Gerald Bantag, ang higpit nga kaaway sa mga drug lords ug ubang sindikato sulod sa           Bilibid.

 Gisuspenso ni Remulla si Bantag, gikuhaag armas, sakyanan, mga tawong sinaligan ug giparelibohan sa rated dilawan Gregorio Catapang, kinsa mahilig mohimog showtime nga ang grupo ra nilang Remulla, dilawans ug drug lords maoy gilamian.

Ang nakamaot, kay hasta si kanhi Pres. Rodrigo Roa Duterte (PRRD, gusto pang iduhig sa mga pasumbingay’ng gipalanog ni Leila de Lima sa social media, nga klarong nagtumbok-namasangil ni PRRD nga mao kunoy tinuorayng mastermind sa Percy’s murder case. Ug dili si Bantag.

Subay ning nagsunodsunod ngil-ad panghitabo, himatikdan, nga sagad sa mga kanhing opisyales nga gipanudlo ni PRRD gipang-ilisan ni PBBM og mga Dilawan’s blood.

Kon kini magpadayon, diin ang mga lig-ong haligi sa nasod iyang gipamulihag gabok, delikadog mao ra unya kini ang makapahagba sa nagakahuyang niyang administrasiyon.