Gubaon nga ekipo sa tugpahanan?

Human sa nahitabong aksidente sa abyon nga gipanag-iya sa Korean Airlines diha sa runway sa Mactan Cebu International Airport (MCIA) niadtong Dominggo sa gabii, mitumaw ang daghang mga kasayuran mahitungod sa giingong kakuwangan sa tugpahanan.

Usa sa mga kasayuran nga mitumaw mao ang giingong gubaon nga Instrument Landing System (ILS) sa tugpahanan. Ang ILS giingong importante kaayo panahon sa night landing tungod kay mao ni magsilbing giya sa piloto.

Ang tinubdan sa maong kasayuran suhito sa sitwasyon sa tugpahanan apan mihangyo nga di magpaila. Sumala pa sa iyang mensahe nga gipadala sa usa sa mga editor sa The Freeman, “…looy kaayo ang pilot dugay sya nagholding kay kusog ang ulan. Walay ILS sa Mactan dugay na wala ma repair…”

Gawas niining maong tinubdan, dunay pay laing mga nasuhito pud sa tugpahanan nga naglakip sa usa ka piloto ang midason nga tinuod nga dugay na nga gubaon ang ILS sa tugpahanan sa Mactan.

Gisuwayan og pangutana sa The Freeman ang assistant general manager sa MCIA nga si Atty. Glenn Napuli mahitungod sa maong kasayuran apan wa siyay direktang tubag niini. Apan masabot sa iyang tubag nga ang iyang gipasanginlan sa pagkaguba mao ang aksidente nga nahitabo sa abyon sa Korean Air.  Nagpadayon pa ang imbistigasyon sa mga awtoridad dinhi sa nasud apil na sa mga experto gikan sa South Korea aron pagsuta unsay hinungdan sa aksidente. Hinaut lang nga wala mahimong usa sa mga hinungdan sa aksidente ang giingong kakuwangan sa ekipo sa atong tugpahanan. Ug labaw sa tanan hinaot nga dili tinuod ang maong mga kasayuran tungod kay dili ni makaayo sa imahin sa tugpahanan sa Mactan ug sa Sugbo sa kinatibuk-an.

Kun ugaling tinuod man nga dugay na nga guba ang ILS sa Mactan ug wala matagad og paayo, hinaut dunay imbistigasyon nga himoon ang mga hingtungdan nga ahensiya sama sa Department of Transportation (DOTr) aron manubag ang mga tawo nga posibling nagpabaya sa ilang katungdanan. Dako nga konswelo hinuon nga way mga naangol ni nakalas sa maong aksidente. Luwas ang tanang mga pasahero apil na ang crew sa abyon bisan pa sa kadaot nga nahiaguman sa abyon. Nabalda man sa makadiyot ang operasyon sa tugpahanan apan dyutay ra kini nga purhisyo kun itandi sa mas dako nga trahedya kun duna pay mga nadisgrasya nga kinabuhi.