EDITORYAL - 4Ps angay susiho’g balik

Kinahanglan gyud tingali nga balikan og tan-aw sa mga magbabalaod ang 4Ps program sa gobiyerno kung duna ba gyud kini natabang sa mga kabus nga mga pamilyang Pilipino.

Apil tingali sa kinahanglang tan-awon kun nagamit ba gyud sa husto ang kwartang tabang sa gobiyerno, pila ka mga kabataang kabus ang natabangan sa pagtungha ug kun nausab ba gyud ang ilang kabutang.

Klaruhon kung pila ka tuig tabangan ang kada pamilya o kun nakalingkawas na ba gyud sila sa kakabus.

Dili palang dugay ang DSWD mipahibalo nga gitangtang na niini ang 1.3 milyones ka benepisaryong pamilya, kay kuno, nakalingkawas na sila sa kakabus.

Duna say gipangtangtang tungod wala sila motuman sa kasabotan o mga rekisitos nga gipangayo sa departamento bugti sa pagtabang kanila.

Apan sa bag-ohay lang gipagawas nga report sa Commission on Audit, giingon nga 90 porsiyento sa mga benepisaryo sa 4Ps kabus pa gihapon bisan dugay na silang nagdawatan og ayuda gikan sa DSWD.

Sa performance audit sa maong programa, ang COA miingon nga dunay 3,820,012 sa 4,262,439 ka aktibong 4Ps beneficiaries sud na sa pito ngadto sa 13 ka tuig.

Sa suma total P537.39 bilyones na nga cash grants kutob niadtong Hunyo 30, 2021 ang nahatag sa gobiyerno.

Sumala pa sa COA, tungod sa pandemiya nabira og balik ang maong mga benepisaryo sa pagkakabus bisan og dugay na silang gitabangan sa gobiyerno.

Sa ato pa, gikan adtong Hunyo 2021 nakabangon na diay gikan sa maong kakabus ang 1.3 milyones ka benepisaryong gitangtang na sa listahan?

Basin tungod kay naabtan na sila og pito ka tuig diha sa maong programa.

Kung mao na, may punto ang kabalaka sa COA nga nag-ingong gibanabanang 2.6 milyones ka mga tinun-ang nagsalig sa 4Ps ang posibleng dili na makatiwas ilang pagtungha.

Subay sa balaod, pito ka tuig ang tagal sa matag benepisaryo sa programa. Pananglitan og dunay mga pamilya sa 1.3 benepisaryong gitangtang apil sa nabira og balik sa kakabus tungod sa pandemiya, luoy kaayo.

Base sa survey,  19.99 milyones ka Pilipino ang nagilaid sa kakabus sa tuig 2021, mas midaghan itandi niadtong 2018 nga 17.67 milyones sumala pa sa Philippine Statistics Authority nga naghimo og survey kada tulo ka tuig.