Bisan pa’g hulboton si Rizal

Wala ug tuo ang mga batikos nga naangkon ni Presidente Ferdinand Marcos Jr. gumikan sa iyang palpak kuno nga pamalakad sa nasud sa unang100 ka adlaw sa iyang administrasyon human sa iyang kadaugan sa national elections sa nakalabay’ng Mayo.

Matud sa oposisyon, ilabina sa mga militante, pakyas si Marcos pagbangon sa ekonomiya sa nakalabay’ng tulo ka bulan human sa iyang paglingkod sa katungdanan. Ug nga mas giuna kuno niya ang paglakwatsa bisan pa kuno sa mga kalamidad nga miigo sa nasud.

Gani daghan ang nakamatikod nga walay klaro ang kamada hasta sa gabinite ni Marcos, kinsa wala pay gitudlo nga permanente nga secretary sa Department of Health ug Department of Agriculture. Kini pun-an pa sa kontrobersiya sa pag-resign sa pipila ka key government officials.

Hinuon dili lamang ang kagamhanan ni Marcos. Sentro usab sa mga batikos sa oposisyon ug militante kaniadto ang nakalabay’ng mga administrasyon nga wala kunoy nahimo sulod sa unang 100 ka adlaw sa ilang pangatungdanan. Dili na kini ikatingala pa.

Nahinumdom ko nga sa panahon nilang Presidente Rodrigo Duterte, Benigno Aquino III, Gloria Arroyo ug sa uban pa, puro tagawtaw usab ang oposisyon ug mga militante batok sa ilang mga administrasyon nga wala kunoy nahimo pagbangon sa nasyonal nga ekonomiya.

Apan dili maoy sukdanan ang unang 100 ka adlaw sa pagpangatungdanan kon maayo ba ang dagan sa usa ka administrasyon. Angay hinuon natong hinumdoman nga ang termino sa usa ka  presidente sa Pilipinas mokabat ngadto sa unom ka tuig.

Walay maayong laki nga presidente nga mohimo dayon og milagro sulod sa unang100 ka adlaw sa iyang termino. Bisan pa kon atong hulboton si Jose Rizal gikan sa iyang gilubngan, paputol ko sa atong tudlo kon masulbad niya ang mga problema ning nasud sulod sa 100 ka adlaw.

Matag presidente lahi ang diskarte. Adunay nagpakitang gilas inig lingkod dayon sa puwesto apan wala ka lahutay ug  kadugayan nagkayamukat ang dagan sa administrasyon. Adunay nagyaya lamang pagsugod sa iyang katungdanan apan hilabihan ka daghang proyekto ug programa ang napatuman sulod sa kinatibuk-ang termino.