Magsayo aron dili mababoy sa trapik

Mora’g nabag-ohan ko ug wala ka sagang sa trapik niadtong Lunes atol sa pagbukas sa in-person classes nga nababoy sa akong naandan nga agianan sa rota padung sa trabahoan tungod sa kadaghan na sa mga sakyanan nga nang gawas.

Kasagaran mogikan ako sa among balay sa Barangay Babag dakbayan sa Lapu-Lapu alas 6:30 sa buntag aron segurado nga dili ko maabtan sa paghuot sa mga sakyanan. Apan sa pag-abot nako sa karsada hilabihan naman sa ka taas sa linya sa mga sakyanan nga walay irog irog.

Tungod diay kadto sa pagbukas sa klase sa duol nga eskwelahan sa among balay maong nituyok nalang ko ug didto niagi sa Cebu Cordova Link Expressway kon CCLEX. Puwerte ra gyung dalia ko nakaabot sa Cebu City gikan sa Lapu-Lapu apan bayad sad lagi og P90.

Hayahay kaayo ug walay hasol kay mora’g ikaw ang nakapanag-iya sa CCLEX sanglit nihit man ang niagi nga mga sakyanan pero mabuslot pud ang bulsa kong sigehon og agi. Mas ok lang ni kong nagdali ug duna usay budget.

Bitaw, sulod sa kapin duha ka tuig nga pandemiya naanad kita nga hawan kaayo ang mga karsada kay wala may kisaw ang mga tunghaan. Ug karon nga balik na sa naandan ang kasikas sa mga eskwelahan pastilan hangpon nalang nato og balik ang kanhi natong kasinatian kay mao naman gyud kini ang kamatuoran.

Sa wala pa ang pandemic naandan nako nga mobiyahe og sayo gikan sa balay aron dili maabtan sa trapik. Busa karon adjust na sad ta og balik diin ipahaum nato sa atong oras ug sa sitwasyon sa atong mga agianan.

Lisod kaayo nga matanggong ka sa karsada kay kalas sa gasolina hilabihan ra bang mahala. Ug ang makaparat natanggong ka na sa trapik na-late ka pa. Busa magsayo nalang gyud aron dili mahutdan sa fuel sa sakyanan ug dili pa usab ma-late sa trabaho.

Dali ra kaayo ang panahon, ang kadalanan nga nagmingaw kaniadto, karon subling nabibo. Mora’g natulog lang kita ug sa pagmata nato ang kamatuoran nga dili na nato kalikayan, balik na ta naandan ang panahon nga wala pa ang pandemic.

Hinaut unta nga mao na kini ang atong pagpadayon sa kinabuhi nga dili na kita maghunahuna pa sa mga makalilisang nga kahadlok tungod sa balatian.