EDITORYAL - Pilipinas digital

Digitalization. Mao kini ang gustong buhaton sa halos tanang mga nasud sa kalibotan aron mas mapadali ang tanang mga transaksyon sa pribado man o sa panggobiyerno.

Apan ang Pilipinas biya gihapon kaayo pagabot niini. Kini bisan pa og ang Pilipinas nahimo pa kaniadtong “texting capital” ug daghan sa mga Pilipino ang dunay access sa internet pinaagi sa ilang mga android, smart o i-phones.

Kini tungod kay bisan tuod daghan ang nagbaton niining mga modernong teknolohiya, dili tanan sa business sector o bisan sa mga ahensiya sa gobiyerno ang digitalized na.

Samtang dili sab tanang Pilipino nga nagbaton niining mga modernong gadgets makamao mogamit niini, samot na mosulod sa mga websites sa mga ahensiya sa gobiyerno o ba kaha mga patigayon nga dunay online transactions.

Lain sab kamatuoran ug subo pamalalandungon, ang pipila sa mga ahensiya sa gobiyerno nga ma-access na unta pinaagi sa online o internet ang dili sab daling o wala gyuy motubag ug ang uban lisod kaayong tutltolon ang websites.

Kini tungod kay kining mga ahensiyaha walay mga tawong nag-monitor sa ilang internet communications aron makaatiman dayon sa mga pangutana sa publiko bahin sa ilang mga serbisyo o transaksyon.

Husto si Presidente Ferdinand Marcos Jr., kinahanglan sa Pilipinas palambuon ang digitalization niini. Pinaagi man gud niini, ang tanang mga transaksyon mahimong ipaagi nalang sa online.

Sa karon nga panaho, importante kaayo ang internet ug digitalization kay kung dili mosaka sa panahon ang Pilipinas mabiyaan kini ug adto puniton sa panitikag baki.

Apan dili kini makab-ot kun magpadayon ang monopoliya sa pipila lamang ka buok nga telecommunications companies, nga inay nga magpanindotay ug pakusganay og internet, daw nagkumboya na hinuon sa pahinayay sa ilang signal.

Kinahanglan sab nga dunay himuong pamaagi ang gobiyerno nga mas mapasayon sa katawhan ang pag-access sa tanang websites sa mga ahensiya niini nga maghatud og serbisyo sa publiko pinaagi lang sa online transactions.