Krimen ang mamiya og hinigugma

Nipasaka og balaudnon sa Ubos Balay Balauranan si Negros Oriental Kongresman Arnolfo Teves Jr. nga nagdeklarar niadtong mamiya og hinugugma nga iya nang gikapuyo nga krimen.

Ubos sa House Bill No. 611 nga giulohan og Anti-Ghosting Bill. Ang ghosting usa ka matang sa pag-abuso sa  emotion ug kini mahitabo kun ang ang usa ka tawo nakiglambigit sa usa ka relasyon sa pagpakig-date sa usa ka babaye o lalaki nga nakaapekto sa estado sa panghuna-huna sa biktima.

Ang kongresista mipasabot nga ang ghosting mahimo mentally, physically ug emotionally exhausting sa tawo nga gi-ghost. Ang kalibog sa ghosting mao ang pagka walay tinuod nga pagtapos sa relasyon sa duha ug kini mapariha sa usa ka matang sa emotional cruelty ug kinahanglan nga silotan kay makonsiderar kini nga emotional offense tungod sa trauma nga namugna ngadto sa gi-ghost nga partido matud pa ni Kongresista Teves Jr. sa iyang pagpasabot.

Apan ang buot ipasabot sa ghosting adunay limitasyon diin ma-apply lamang kini niadtong anaa sa dating relationship. Ang buot ipasabot sa dating ubos sa balaudnon mao kadtong nagpuyo-puyo nga dili minyo.

Sa tinamban nato nga pagsabot ang balaudnon ni Teves dili ma-apply sa manag-uyab. Busa kun buwagan ka sa imong uyab bisan pa og na-trauma ka ug nag antos ka sa kasakit nga imong gibati, dili nimo siya makiha ubos sa balaudnon ni Teves.

Seguro kining balaudnon ni Kongresista Arnolfo Teves Jr. bunga sa iyang kasinatian o ba kaha sa naghimo sa iyang balaudnon. Seguro may punto ang kongresista sa pagpanday niining maong balaudnon. Pero aduna pa siguro mas mahinungdanon pa niini nga angayan untang unahon niya sa pagtagad kay sa mga pagbati nga nasakitan.

Hinuon dili na ta matingala niining Kongresista Teves kay mao pod ni siya ang nipasaka

og balaudnon nga magpausab sa pangalan sa Ninoy Aquino International Airport ngadto na sa Ferdidnand Edralin Marcos International Airport tungod kay ang nahisgotang Marcos mao ang nagpatukod sa nahisgotang tugpahanan. Apan ang kasaysayan sa tugpahanan nag ingon nga gitukod kini niadtong tuig 1947 ubos sa pamunoan ni Presidente Manuel Roxas.