Ang nakapalisod sa sayon

Isip maoy midaug pagka presidente sa Pilipinas pinaagi sa super majority votes, si Pangulo Bongbong Marcos (PBBM) gihatagag gahom sa pagpili kinsay iyang ibutang nga secretary sa tagsatagsa ka departamento o ahensiya sa gobiyerno, nga maoy maglangkob sa kinatibuk-an niyang cabinet members ug maoy iyang mga kaabag sa pagpamugsay diha sa paglawig sa atong nasod paingon sa gitinguhang kauswagan.

Dugay nang nag-antos ang Pilipinas sa daw wala nay pagkaalim nga sakit sa korapsiyon, mugna sa gipang-asaying mga lider sa nagkadaiyang dagkong buhatan, kinsa inay moprotehir sa imahe sa nangaging mga presidenteng mi-appoint kanila (hinuon dili tanan) mao hinuoy miunay sa pagguba ug paghugawhugaw niini human matental sa pagpangawkaw.

Pagpuo sa ilegal nga drugas ug korapsiyon nga gibilin ni kanhi Presidente Rodrigo Roa Duterte sa Malakanyang, gidawat ni PBBM ug misaad nga pahaiton pa ang pagsumpo niini. Hinungdan, nga ingat kaayo si PBBM sa pagpili og mga miyembro sa iyang gabinite. Misaad baya siya, nga pabaratohon ang presyo sa bugas ug paubsan ang bayranan sa tubig ug kuriyente. Unsaon na lang, kon kini dili matuman? Kay ang gi-appoint, piranha diay!

Tinuoray, dili dali ang pagkompleto dayon sa iyang cabinet members. Gani, sa pagsulat niini, may nagpabilin pang mga bakanteng puwesto. Labi na, kay halos tanang nangaplay sa usa ka posisyon, mga suod nyang higala ug sa ilang pamilya. Unya, may dakong natabang panahon sa elesiyon.

Sa laktod, ang ‘utang na loob’ maoy nakapasamot sa kabug-at diha sa iyang pagtimbangtimbang kinsay dawaton? Unta, ang kalig-on sa iyang political will maoy mopasulabi. Ug ang most qualified gyod, maoy pik-apon.

Ning pagpili kinsay ibutang ni PBBM sa mga sensitibo ug taas puwesto sa atong kagamhanan, mas maayong tangtangon una niya ang ‘utang na loob’ sulod sa iyang manggiikugong kasingkasing. Kay matang kini sa pagbati nga makalubog sa katin-aw sa panghunahuna ug mao hinuoy nakapalisod sa sayon ra unta niyang hukman.

Hinuon, dili tanang nautangan niyag utang kabubut-on, habolan. Aduna poy hait, kinsa isog mopatay sa korapsiyon kon mohasmag kini sa iyang galamhan. Kay iyang kaligdong lig-on. Ug sa mga anay sa katilingban dili madutlan.

Unta, kining maong ka matang sa mga mangangalagad ang pinaleng mapili ni PBBM.