Political will

Naluoy ko nga nagtan-aw sa mga kawani sa kagamhanan nga miubog tawon sa hugaw nga tubig sa sapa, taga hawak ang giladmon, aron pagkuha sa mga sagbot nga nakabara sa mga agianan sa tubig.

Kining mga nakabara sa mga imbornal, sama sa plastic nga sudlanan sa tubig, mga kahoy gikan sa guba nga balay, ug uban pa nga matang sa basura, dili unta mahipunta diha sa sapa kon wa pa ipataka’g labay sa mga tawo nga “way utok.”

Kon mosuyla na gani ang tubig sa sapa kay naalihan na man sa maong mga basura, ang tubig molunop kini sa kabalayan, ug ang basulon dayon sa katawhan mao ang mga opisyal sa kagamhanan.

Mahimong mabasol usab ang mga opisyal sa kagamhanan, ilabi na ang mga opisyal sa kabarangayan, kay nganong wa man sila makapatuman sa balaod nga pangdakpon ang mga tawo nga nagpataka lang og labay sa ilang mga basura.

Apan dili makiangayon nga ang mga opisyal ra maoy atong basulon kon maglunop na ang atong mga dapit atol sa pag-uwan, basulon usab nato ang atong kaugalingon.

Dinhi sa Cebu City, awhagon nako si Mayor Michael Rama nga mohimo kita og hugtanay nga kampanya batok sa mga tawo nga magpataka lang paglabay sa mga basura.

Pagka karon, kiyugpos ra gyud kaayo ang atong mga opisyal sa kabarangayan nga dili gyud manakop kay mahadlok nga kon mag-eleksyon sa barangay, basin ug dili sila makadaog pag-usab.

Didto sa Singapore, hilabihan ka estrikto sa balaod nila didto nga bisan gani ang pagpataka og pagpangluwa, multahan ka na kon makit-an ka sa mga tigpatuman sa balaod.

Apan dinhi sa ato, sus, makita gyud nimo nga dunay mga tawo nga yano ra kaayo nga moitsa sa ilang mga basura diha sa publikong mga dapit sa way paghunahuna nga makamugna og problema sa kadaghanan ang ilang gihimo.

Usbon nako pag-awhag ang mga mayor sa lainlaing dapit nga kinahanglan na karon ang “political will” aron kamo makabaton og kaisog pagpatuman sa balaod.

Timan-i nga mas daghan ang nagbinuotan ug nagtuman sa balaod, ug mas mas daghan ang malipay kon pangdakpon kining mga tawo nga naghatag lang og problema sa kadaghanan.

Ayaw kahadlok nga adunay masuko kaninyo kay sila nadakpan sa pagpataka’g labay og mga basura, kay sa likud sa maong mga tawo, anaa ang liboan ka tawo nga nangalipay ug modayeg sa inyong pagahimoon.

Bag-o pa kamo nga naglingkod sa inyong katungdanan pagka mayor, ug kinahanglang ipakita ninyo nga tinuoray ang inyong pagserbisyo para sa kinabag-ang mga lumolupyo.