God, country, family

Migawas ang tinuorayng rason nganong gibotaran si Davao City Mayor Inday Sara Z. Duterte-Carpio pagka bise presidente sa Pilipinas sa 32M kapin ka Pilipino sa miaging Mayo 9 nga piniliay, diin gilubong og taga liog tanang kaatbang.

Nagkalainlaing pagdaot gikan sa mga Marites, kinsa gustong lunoron ang kandidatura ni Inday sa iyang paglawig paingon sa ikaduhang kinatas-ang puwesto sa Malakanyang, wala magsilbe. Sila pa hinuoy nakapadaog niya.

Sa iyang inaugural address human makapanumpa isip bag-ong bise presidente sa Pilipinas didto sa San Pedro Square, Davao City niadtong Hunyo 19, 2022, sama sa banagbanag, gisubli ni Inday ang pagpabuhagay sa bulawanong kahayag nga naglumlom ilawom sa iyang kasingkasing.

Kasingkasing nga andam kanunay mosilbe sa atong Ginoo, komunidad ug iyahang pamilya. Matud ni Inday: “One of the most important lessons I have learned, as I navigate life, and the same thing that I believe we should ponder upon, as a one country, united in our determination to overcome our difficulties and achieve our aspiration is that, we should commit to the…to heart. The priority of: God, country and the family.”

Makagisig kasingkasing kining gipabuhagay ni Inday. Tiaw bay, dako kaayo iyang pagtahod-pagtuo sa atong Ginoo. Nga sa ato pa, magasubay gyod sa kabubut-on sa Diyos ang iyang pagpangalagad sa katawhan.

Mao diay, nga bisan niadtong ilang pangampanya ug hangtod karon nga sila na si BBM ang modala sa renda sa atong nasud, walay hunong ilang panawagan og kahiusahan alang sa tanan. Gani, lakip mga kaaway sa politika, ilang giagni.

Ang iyang igsuong incoming Davao City Mayor Baste Duterte, mihulagway ni Inday nga usa ka very workaholic public servant. Pirmeng nakapokus ang hunahuna ug buhat sa mga butang nga makaayo sa katilingban. Nga hasta ang para sa kaugalingon, malimtan na lang.

Gani, imbes ang pamilya maoy himoong second priority next to God, ang komunidad ug nasod maoy gipalabi. Hinungdan, nga gitambagan siya ni Baste, nga unta dili magpasagad sa kaugalingon, ilabi kon magsugod nag trabaho isip Bise Presidente ug DepEd Secretary sa atong nasod.

Hulog si Inday gikan sa langit. Siya ang gipadala sa Ginoo aron maoy moalim sa masakitong sistema sa atong edukasiyon.

Angay siyang ampingan ug tabangan!