Garbo ni Año

Usa ray hinungdan nganong naghurumentado ang mga nagtuong gamhanan sa kaulohan dihang nasayod nga gihimo na'ng optional sa lalawigan sa Sugbo ang pagsul-ob og facemask sa gawas ug abrido nga mga lugar---garbo.

Natandog ang garbo sa mga halangdon sa imperial Manila ug dili kadawat nga naunhan sila pagpatuman niini sa probinsiyana.

Dili ni unang higayon nga nag-una si Gobernador Gwen Garcia pagpatuman og mga lagda nga gisupak sa mga opisyal sa kaulohan apan gisunod ra sa himanhiman.

Nahinumdom pa mo sa motorcycle barrier nga pwerte gyung pangugat ni DILG Secretary Eduardo Año ug sa iyang mga alipores nga ipatuman kay lagi kuno gibasi ni sa science? Hain naman ron ang maong lagda nga naa paman kaha ang COVID?

Dili ba misunod ra sab sila sa polisiya sa lalawigan? Ikaduha, ang lagda sa probinsiya mahitungod sa gidugayon sa quarantine sa mga overseas Filipino nga mopauli dinhi sa nasud. Unsa naman dili ba nisunod ra sab sila sa probinsiya?

Karon ang facemask. Nainsulto na pud si Año nga unang nakahuna-huna ang gobernador sa Sugbo nga himuon nalang ni nga optional sa outdoor?

Ambot og unsay iyang problema sa maong lagda nga karon usa na gyud nga ordinansa dinhi sa lalawigan nga wala man hingpit tangtanga ang paggamit niini?

Igo lang gihatagan sa gobernador og option ang publiko nga kun naa ka sa gawas mahimo ka nga dili mag mask apan walay nagpugong ni bisan kinsa kun padayon silang magsul-ob niini.

Wala kinahanglana nga maghurumentado si Año nga lakip ang ordinaryong opisyal sa kapolisan iyang relibohan tungod lang kay nisuporta sa polisiya sa lokal nga opisyal.

Napagan intawn si Col. Engelbert Soriano, hepe sa kapolisan sa Sugbo. Narelibohan sa katungdanan og dili oras.

Kini tungod lang sa garbo ni Año ug sa ubang nagpakahalangdon nga mga opisyal sa kaulohan bisan naghinapos na ang ilang termino.

Gawas pa si Àño mismo ang numero unong malapason sa lagda nga buot niyang tumanon sa publiko.

Si Año mismo nakuhaan og hulagway nga way mask samtang mitambong og kalihukan diin nagdasok ang mga tawo.

Kun but-an siya nga matang sa opisyal siya maoy angayang mohatag og maayong ehemplo sa lagda nga buot niyang ipatuman.