EDITORYAL - Mas daghan ang tarong

Makapahiubos usahay kining mga hitabo nga dunay mga polis nga padayong mibalewala sa ilang gipanumpaang tahas, ang pagserbisyo ug pagprotektar sa katawhan.

Kini bisan pa sa higpit kaayong pasidaan ug paninguha sa ilang mga kadagkoan nga dili moapil-apil sa mga binuang ug ilegal nga binuhatan.

Ang sakit kaayo hunahunaon, kining ubang mga nagpabadlong nga polis nga labaw pa sa mga kriminal nga ilang dakpunon.

Ang PNP naningkamot paglimpyo sa ilang hanay pinaagi sa ilang internal cleansing aron mawagtang kadtong mga drug protectors, gambling protectors, sugarol, mangilkilay, mga tulisan ug uban pa.

Gani ubos sa pamunoan ni Presidente Rodrigo Duterte gipatas-an og maayo ilang sweldo aron dili matintal ug mahaylo sa mga ilegal nga sindikato nga buot mogamit kanila sa ilang kriminal nga mga kalihokan.

Didto sa Caloocan City, ang PNP Internal Affairs Service (IAS) mirekomendar sa pagpalagpot gikan sa serbisyo sa unom ka sako sa anti-narcotics unit sa Caloocan City Police.

Sila gireklamo nga midagmal ug mikuha sa P14 mil nga cash aid gikan sa gobiyerno sa usa ka vendor niadtong bulan sa Marso.

Ayuda gikan sa gobiyerno gitulis sa mga polis nga sinaligan sa gobiyerno pagpatunghay sa kalinaw ug protector sa katawhan. Unsa may nasulod sa hunahuna aning mga polisa?

Si IAS inspector general Alfegar Triambulo miingon nga girekomendar nila ngadto sa PNP Directorate for Personnel and Records Management-discipline, law and order division ang pagpataktak gikan sa serbisyo sa unom.

Dili palang sab dugay, dunay usa ka polis sa drug enforcement unit sab dinhi sa Police Regional Office-7 ang gidakop sa mga tawo kay matud pa nangawat og kable sa telecommunications company sa usa sa mga barangay sa Cebu City.

Subo kaayo palandungon nga duna pa gihapoy mga polis nga gamiton ang ilang gahum aron paghimo og krimen, ilabi na nga sayod silang dili moreklamo ang ilang biktimahon kay mahadlok nga balikan.

Apan bisan pa niining pipila ka lugas nga nagpabadlong, angay saludohan ang PNP sa ilang paningkamot pagpapha sa mga abusado nilang mga sakop. Kinahanglang ipasalig sa PNP nga kasaligan gihapon sila sa katawhan kay mas daghan man ang tarong kun itandi sa mga nagbinuang.