Di sayop sa LTO

Gibalikas sa mga Bol-anon ang Land Transportation Office (LTO) tungod sa sunod-sunod nga operasyon niini pagpanakop sa mga malapason sa lagda sa trapiko.

Ang mga tag-iya og motorsiklo nga nadakpan tungod sa nagkadaiyang kalapasan sama sa pagmaneho nga way lisensiya ug pagpadagan sa ilang mga motorsiklo nga way rehistro labihang nakabagulbol tungod sa gihimo sa LTO.

Ilang reklamo mao ang giingong pagpabalikbalik sa LTO kanila aron makuha ang ilang mga motorsiklo nga giimpound.

Ang uban nireklamo nganong manakop ang LTO niining panahon sa pandemiya.

Samtang ang uban mibasol sa LTO tungod sa kalangan sa rehistro sa ilang mga motorsiklo.

Tinuod nga makapungot ang kalangan sa rehistro. Apan dili sayop sa LTO ang pagpanakop sa mga malapason sa lagda.

Dili rason nga langan ang proseso sa pagparehistro aron imong padaganon ang imong motor bisan ikaw sayod nga kini wa pay rehistro.

Trabaho sa LTO ang pagpanakop sa mga malapason sa lagda busa ayaw kasuko kun ikaw madakpan. Imong sayop ang pagmaneho nga way lisensiya ug way rehistro.

Mahitungod sa kalangan sa registration paper, dili ang LTO maoy angayang basulon sa mga tag-iya og motorsiklo kun dili ang dealer diin nila gipalit ang ilang motor.

Obligasyon sa dealer ang pagparehistto sa motorsiklo nga ilang gibaligya. Ilang trabaho ang pagproseso niini didto sa LTO ug angayang ilang irehiatrong daan ang mga motorsiklo sa dili pa nila irelease ngadto sa ilang mga customer.

Ang ubang dealer motugot nga madala sa buyer ang motorsiklo pinaagi sa temporaryo nga permit sa pag-operate niini.

Ang maong permiso nagtugot lang sa pagpadagan sa motorsiklo gikan sa dealer paingon sa panimay sa buyer.

Ang mga dealer hugot nga mobaod sa mga buyer nga dili pa nila mahimong gamiton ang motorsiklo hangtud nga mahuman ang rehistro.

Apan dunay uban nga gahi gyud og ulo mopugos paggamit sa motorsiklo bisan og way rehistro. Unya nganong ang LTO man ang inyong awayon sa inyong kayabag?

Tinuod dunay say mga kakuwangan ang naasoy’ng ahensiya apan dili ni rason aron mohimo ta og mga butang nga kita mismo sayod nga kalapasan sa balaod.