Sa panahon nga iisa na

Pinasikad sa Juan 3;7b-15

Sa dihang nahimong masupilon pag-ayo ang mga tawo niadtong kapanahonan ni Moises samtang padulong pa sila sa yutang gisaad. Ang maong kamasupilon maoy nakapapungot sa Dios nga tungod niini iya silang gisilotan lakip na niini ang pagpadala niya sa mga bitin nga mga malaa nga nakapatay usab sa daghanang mga Israelita.

Gikan niini namugna ni Moises ang Bitin nga Tumbaga aron si bisan kinsa nga mosud-ong niini dili gayud mamatay. Mao nga kadtong napaakan sa bitin mosud-ong gayud sa maong Bitin nga Tumbaga.

Ang ebanghelyo ni Juan dunay duha ka bahin. Ang book of Signs ingon man ang Book of Glory. Ang Book of signs mao kadtong bahin diin natala ang mga Milagro ug mga pagsangyaw ni Jesus panahon sa iyang public ministry.

Sa laing bahin, ang Book of Glory mao kadtong bahin diin gisaysay kun sa unsang paagi namatay ang atong  Ginoo. Salikwaot palandungon kay ngano man gud nga ang giisip natong Ginoo gilansang man sa Krus?

Apan kadtong maong kahimtang ug kasinatian, kasinatian man sa kahimayaan. Kasinatian sa kahimayaan tungod kay kadtong maong panghitabo mao man ang makabayad nga kamatayon sa atong Ginoo alang sa atong kaluwasan. namatay siya aron kita mabuhi.

Ning atong panahon karon, daw idlas ang pulong sakripisyo. Kini tungod kay daghan nato ang dili na gyud tuod buot moantos. Buot kita og hayahay ingon man sayon. Apan ang kinabuhi dili man gyud ingon ana. Bisan gani ang panaw sa pagtuo. Mao nga dunay mga higayon nga kita paakon sa mga bitin sa atong kaugalingong mga sala. Ug gumikan sa maong pagpaak daghanan kanato ang mangamatay gayud.

Angayan natong hinumdoman nga sa panahon nga kita iisa nga sa ato pa:

A.  Mosaka kita sa atong kaugalingong mga bukid sa kahilom ug pagpamalandong atong makita ang tambal sa atong mga sala, ang mapasayloong gugma sa Dios alang kanato.

B.    Tungason nato ang atong tagsa tagsa ka mga tinguha alang sa atong mas hamtong nga pagsabot sa kinabuhing balaan.

C.  Dili tinalawan ang paglikay ug pagsibog gikan sa kalibutanong haylo. Usa lamang kini ka pag-angkon sa buhing matuod nga kun wala ang Dios wala kitay mahimo (Jn. 15;5).