EDITORYAL - Responsibilidad sa tanan ang pag-amping

Daghan ang nasagmuyo tungod sa kabalaka sa nakitang pagdasok sa mga kabataan sa “Arat Na Cebu!” nga usa ka konsiyerto nga matud pa sa organizers dili political concert kondili pagpasalamat sa Sugbu sa kalamposan kontra sa pandemiya batok Covid-19, bisan dunay mga lokal nga politikong nanambong.

Ang mga videos ug mga hulagway nga na-post sa nagkadaiyang social media ug pamantalaan nagpakita sa grabeng kadaghan sa mga tawong nanagdasok sa Cebu City Sports Complex. Gibanabana nga moabot og 60 mil ka tawo ang naa sa sulod samtang kaliboan sab ang nangatanggong sa gawas kay wala na pasudla sa mga polis. Apan bisan pa sa pahimangno ug pasidaan bahin sa hulga sa Covid-19 ug kanunayong pagtuman  sa social distancing ug health protocols wala gyud kini tumana sa mga nanan-aw, duna gyuy mga wala magsul-ob og mga facemasks samtang nakigdutdotay sa mga tawo.

Ang Department of Health-7 nanghinaut nga ang maong kalihokan dili maoy hinungdan sa pagsaka unya sa mga kaso sa Covid-19 dinhi sa Sugbu. Gihulagway kini nga klase sa kalihokan nga “super spreader.”

Apan unsaon man sa mga tawo kun mismo ang mga opisyales sa gobiyerno ug mga otoridad nitugot man ani nga mga kalihokan? Ilahang kaakohan ang pag-amping sa ilang kaugalingon ug dili husto nga mag-amping lang kun dunay nagtan-aw nga magbalantay.

Samtang tuod kadaghanan sa mga nanambong mga kabataan tag-as og resistensiya batok sa Covid-19 apan sigurado ba kaha nga ang tanan didto pulos kompleto na sa bakuna, wala ba kaha sila magdala og virus sa ilang pagpauli? Ang tubag niini mao kini, samtang tuod dako og tulobagon ang gobiyerno sa pagsiguro sa kaluwasan sa tanan, apan  responsibilidad sa matag usa ang kaugalingon.

Dunay gilatid nga health protocols nga sayon rang sundon. Dili mahimong magpakaulipon ang katawhan sa maong pandemiya, kinahanglang makat-on nga magpuyo nga naa ning Covid-19 sa palibot nga maoy gitinguha sa tanan. Mao bitaw ni ang tumong nganong kinahanglang magpabakuna batok Covid-19 ang tanan , ang makab-ot ang herd immunity ug makabaton og proteksyon batok sa maong sakit aron dili na kinahanglang maospital kun matakboyan man.