Debate’ng  gibalibaran

Mas nindot ang debate sa presidential candidates kay sa interbiyu lamang. Sanglit sa debate, mapagawas ang tinagoang kaalam sa matag kandidato diha sa ilang pagtubag sa mga pangutanang giandam sa mga tagdumala.

Apan dili tanang presidentiables, kinsa giimbitar sa SMNI channel alang sa 2022 Presidential Debate, ang misanong. Adunay mibalibad: si Leni, Ping, Manny ug Isko.

Hinuon, may iyaiya silang rason. Pero bisag unsa pa ilang i-alibi, dili kini maayo paminawon. Sanglit nagpakita lamang sa ilang kahuyangan. Diin, sa pagpakigginubatay pa lamang og mga pulong, miatras na daan.

Unsa na kaha kon ang ilang atubangon mao ang mga dagkong krisis nga mohasmag sa Pilipinas kon sila maoy mapiling pangulo? May kaisog kaha sila sama ni Presidente Rodrigo Roa Duterte sa higayong may kalit lang laing pandemiya nga mas mangtas pa kay sa COVID-19 nga mohugpa sa atong nasud?

Ang nagpungasing bala sa mga pangutana nga ipalupad-tira tumong ngadto sa mga kandidato gikan sa mga panelista, pulos ra mga pulong. Dili makamatay. Unya nahadlok na sila?

Ang debate para sa presidential candidates usa ka gamay’ng hangyo gikan sa tanang botante nga angay dili pakyason. Kon ang mga botante, kinsa maoy mohukom nilang miaplay sa kinatas-ang puwesto sa kagamhanan pakyason nila, dakong posibilidad, nga pakyason sab sila sa mga botante sa adlaw sa piniliay.

Pipila kanila mipahibalo baya nga wala silay atrasang debate.

Sama ni Manny, kinsa, usa ka higayon, daw nanghagad pa: “Personal! Face to face! Bakit on line? Ano yun? Natatakot sila? Huwag yong online-on line ka. Para magkakaalaman!”

Ug gikan kang Isko: “We will participate because the people deserve to know kung ano ang intensiyon, layunin at pangarap ng mga kandidato para sa kanyang mga mamamayan. Basta ako, isyu based ako.”

Puno sa kaisog ilang gipabuhagay’ng saad nga sila moapil sa presidential interviews ug debates.

 Apan dihang gihagad sila sa SMNI pagsalmot sa ipahigayong presidential debate, sila si Manny, Isko, Ping ug Leni miatras. Nagmatuod lang, nga kining mga tawhana kugihan kaayong mosaad.

Apan dili kaantigo motuman!

Tungod sa debate nga wala nila tunghaa, nakita sa katawhan ang ilang pagka-bakakon. Makatabang pa kaha kini sa paghatag og katumanan sa illang gipangandoy’ng kinatas-ang puwesto?