Bike lanes giisnab sa bikers

Ang halapad dalan sa M. Velez Street, Banawa, Cebu City nagsugod na’g kagamay gumikan sa gipangtaud nga bike lanes diha sa dulhogong dalan duol sa eskina Forest Hills. Kining maong eskina delikado kaayo sanglit gihimong terminal sa mga habalhabal drayber.

Wala lang nila gamitang sakay-kanaogan sa pasahero. Gihimo gyod nilang parkinganan samtang nagpaabot og pasahero.

Sa wala pa butangig bike lanes kining dalana, ang tuong daplin niini paingon sa Salvador Street, Labangon, maoy paboritong agianan sa mga naghaguros nga motorsiklo. Nagtuo kang modemano ang nagmotorsiklo pag-abot sa eskina Forest Hills, pero moderetso diay.

Ang kotseng magsunod, maigking intawon. Tiaw bay, bisag anaa na siya tungod sa eskina aron modemano, may motorsiklo gihapong moobertik sa iyang tuo?

Niadtong wala pay pandemiya ug wala pay red flex posts daplin sa main road, nasinati na ang grabeng kahuot sa trapiko niining eskina Forest Hills.  Labi na sa rush hours. Unsa na kaha karon, diin imbes palapdan kining karsadaa sa atong gobiyerno, gikoral man hinuon ang masig ka daplin og red flex posts?

Ang pait, kay giisnab lang kini sa bikers.  Sanglit anha man gihapon sila agi sa dakong dalan.  Kon sirbatohan ra ba, aron pahinumdoman nga may kaugalingon silang lane, mosiga pang mata. Mao pay masuko!

Angay hinumdoman. Ang orihinal natong karsada gidesayin nga walay bike lanes. Pero pagbuto sa pandemiya, diin tanang pamasaherong sakyanan wala padagana, napugos ang mga trabahanteng kabos paggamit og biseklita.

Dinhi natawo-umol ang bike lanes. Wala hunahunaa sa nagpasiugda, nga kining maong suliran lumalabay ra. Sa higayong makabalik na’g dagan ang daghang pamasaherong sakyanan, modiyotay usab ang magbiseklita. Busa, di gyod unta angay’ng buhatan pag bike lanes ang nagkahagip-ot tang kadalanan.

Kon magpabarog man gyod og bike lanes, kini adto na iapil sa bag-ong himuonong dalan. Nungkang isingit sa unsay nahimo na, diin kini wala mahiapil sa plano. Gani, gipaibot na ni Cebu City Mayor Mike Rama ang mga brandilyas nga nag-ali sa tungatungang bahin sa mga karsada sa atong siyudad. Rason? Aron maluagluag ang dalan.

Unta, ipatangtang usab sa mayor tanang bike lanes nga giisnab lang sa bikers, nakapagamay sa dalan ug nakahatag dugang purihisyo sa mga motorista. Kaya ba, Mayor Mike?