Nagpasagad ba ang gobernador?

Gibasol sa grupong Sanlakas si Gobernador Gwen Garcia sa kamatayon sa 2,504 ka mga tawo dinhi sa lalawigan sa Sugbo tungod sa COVID-19.

Alang nila Teodorico "Teody" Navea ug Atty. Aaron Pedrosa sa grupong Sanlakas, nagpasagad ang gobernador sa iyang obligasyon isip inahan sa probinsiya.

Kini maoy hinungdan nga niadtong Lunes mipasaka sila og kaso didto sa buhatan sa Ombudsman Visayas tungod sa matud nila grave negligence ug grave misconduct nga nahimo sa gobernador.

Ilang gigamit nga rason ang matud pa kapakyas ni Garcia pagtubag sa pandemiya ug ang pagduso sa  alternatibong pamaagi pagtambal sa COVID sama sa tuob.

Kataw-anan ug klarong gigamit ra ang Sanlakas sa pamolitika. Ang ingon niini nga matang sa mga kaso mobutho lang panahon sa eleksiyon.

Ug klarong nagpagamit sa politika ang la-os na nga grupo sa Sanlakas sa pamasin nga mahinumduman ug modan-ag pagbalik ang dugay ra'ng miawop nilang kahayag.

Kataw-anan nga ang gobernador maoy imong basulon sa mga namatay sa COVID.

Dili doktor ug di ang gobernador maoy nag-atiman nila.

Bisan gani ang mga doktor way tulobagon sa mga pasyente nila nga makabsan sa kinabuhi kun way pagpasagad sila nga nahimo.

Isip inahan sa probinsiya nagpasagad ba si Garcia? Ang pagsugyot sa gobernador nga sagupon ang alternatibong pamaagi sa tuob aron palig-unon ang resistensiya dili man tingali sukdanan aron siya kapasanginlang nagpasagad?

Kanus-a man sab nahimong krimin ang pag-aghat sa publiko nga magtuob?

Wala mahitabong gipasagdan sa probinsiya ang mga district hospitals niini. Ug makita ni sa pundo nga gigahin pinaagi sa annual budget.

Tinuod dunay mga kakuwangan apan angayan nga masabtan sa publiko nga dunay limitasyon ang mga district hospitals tungod kay dili man ni sama sa mga tertiary hospitals o mga dagkong hospital dinhi sa dakbayan.

Sayon ra susihon nagpasagad ba ang usa ka opisyal sama ni Garcia sa iyang responsibilidad.

Tan-awa dunay pundo nga gigahin alang sa health services ug kini makita pinaagi sa annual budget. Public record ni og mamahimong masusi ni bisan kinsa nga interesado masayod.

Sigun sa record si Garcia migahin og kapin sa P6 bilyones niining tuiga alang sa social services ug health services apil na niini ang dul-an sa P2 billion alang sa pag-upgrade sa mga district ug provincial hospitals.

Ug alang sa moabot nga 2022 migahin gihapon ang gobernador og kapin sa P6 bilyones alang health services.

Kini ba maoy giingon sa Sanlakas nga pagpasagad?