Dagat himoong yuta

Usa ka gatos ka ektarya nga yuta ang tukoron sa dagat sa lungsod sa Minglanilla sugod sa unang bahin sa tuig 2022. Ning maong yuta pabarugon ang P20 bilyones nga Minglanilla Techno-Business Park nga pagadumalaon sa CLI Subsidiary nga Ming-Mori Development Corporation.

Ang ma-reclaim nga dapit gidesinyo alang sa pagatapokon nga komersiyal, industriyal, sibik ug kalingawan. Ang nagsugyot ning maong proyekto nanghinaut nga ang multi-bilyon nga proyekto makamugna og 75,000 ka mga trabaho alang sa lungsod sa Minglanilla.

Ang mga mananagat nga maapektohan sa proyekto mirehistro sa ilang hugot nga pagsupak. Ilang gisaway ang mga opisyal sa lungsod sa Minglanilla nga gipangulohan ni Mayor Lanie Pena. Ila usab nga gisaway si Atty. Rajiv Enad tungod sa pamahayag niining himuong siyudad ang lungsod sa Minglanilla.

Nauso na gyod ang reklamasyon nga proyekto. Dinhi sa isla sa Sugbo pipila na ka lokal nga kagamhanan ang nagpasiugda niini sama sa dakbayan sa Sugbo, lungsod sa Consolacion, Lapu-lapu ug karon ang lungsod sa Minglanilla.

Gastoso ang reklamasyon nga proyekto ug makadaut usab kini sa mga corals ug marine life. Makausab kini sa kalidad sa tubig sa kasikbit nga dapit ug ang mga materyalis nga gamiton sa paghimo sa proyekto makapasamot sa pagka asidik sa tubig. Ang mga organismo dili makasagop niining maong matang nga environment.

Sigun sa pagtuon nga gihimo sa gobiyerno niadtong 1996, ang reklamasyon makamugna og halapad nga pagkahanaw sa mga marine sediments ug makamugna og bawod-bawod nga lapok ilawom sa gitabonan nga dagat.

Ang reklamasyon nga proyekto makabalda sa ecosystem sa dagat nga magdala ngadto sa soil liquefaction ug makahugaw sa dagat.

Tungod niini adunay lig-on nga rason ang mga mananagat sa ilang pagsupak sa reklamasyon nga proyekto. Kini tungod kay wala lamang kini maghulga sa ilang panginabuhian kun dili naghatag usab kini og kadaut sa corals ug marine life sa dagat nga naghatag og panginabuhian sa mga mananagat.