Sige’g pagarpar

Nangandak ang DOH nga mas may kapasidad na ang ahensiya karon pagpakigsakbang sa bisan unsa’ng bag-ong variants sa coronavirus, human niini masagubang ang pagsulod ug pagdagsang sa tulo ka variants niini nga mao ang Alpha, Beta ug Delta.  Kon basehan ang record sa performance sa DOH ingon man ang ekonomiya, wala kini angay ipangandak.  Ni’ng pamahayag sa DOH, mora’g haum hinoon ang panultihon nga “Ang HANGGAW maghisgot sa iyang pagabuhaton, ang HAMBOGERO maghisgot sa iyang nabuhat, apan ang MAALAMON magabuhat ug magalihok sa tumang kahilom.”  Pagarpar pa more!

Ilegal gihapon

Matud pa ni Archbishop Socrates Villegas nga dili salâ ang pagdawat sa kwarta bugti sa boto kon ang botante dili usab mouyon sa kondisyon nga gilatid sa politiko nga mipalit sa botó, ug nga makataronganon ang pagdawat sa kwarta kon sugô kini sa panginahanglan, sama sa kagutom. Kining pamahayag usa ka ehemplo nga dili gayod magkatakdo ang politika ug relihiyon.  Ilegal ang vote buying ug dili rason ang panginahanglan, sama sa kagutom, aron tugotan kini.  Sa panultihon pa, “Ang lumoy nga balahibo dili makapahimong buotan sa mabangis nga langgam.”  Isip-isip!

Mohirit pa gyud

Human mapakyas sa ilang laraw nga padaganon si Presidente Duterte pagka-bise presidente karong Election 2022, giawhag na usab sa PDP-Laban Cusi Faction nga padaganon kini pagka-senador kay matud pa ni Cusi, anaa sa Presidente ang katakos ug kasinatian sa usa ka maayong senador. Naklaro na kaayo ang despoga ni’ng gibuhat ni Cusi.  Ang kahangol sa gahum maoy hinungdan nga sa walay kukaulaw, padayon ang ilang paghawid sa sidsid sa Presidente.  Makapahinumdum sa sintunado nga buot mosalmot sa bangga sa awit.  Imbes gibalibaran kay yabag lage, mihirit pa gyud pag-ingon nga, “Guest singer na lang ko Sir, pwede?” Pagkatoytoy!

Dili makiangayon

Mipasalig si Secretary Roque nga gukoron sa kagamhanan kadtong mga negosyante nga napakyas pagbayad sa buhis.  Nunot kini sa nadiskobrehan nga ang Pharmally Pharmaceutical Corporation, bisan sa binilyon niini’ng kontrata sa kagamhanan, wala diay makabayad og buhis sa mi-aging tuig.  Tataw nga di maki-angayon ang atong sistema sa pagbuhis.  Samtang ang yanong mamumo-o gibuhisan pinaagi sa “deduction”, ang mga dato’ng negosyante, gibuhisan pinaagi sa “confession” kay lage mag-agad ra kon pilay itug-an nga kita.  Sa Pilipinas, kon sayop ang imong pagkinabuhi, multahan ka; kon maayo ang imong kahimtang sa kinabuhi, buhisan ka.  May’pag moligeed!

Marukoy pa’s botante

Gikatahô nga duha ka suspetsado nadakpan sa kapolisan dinhi sa siyudad sa Sugbo tungod kay naghimo ug nagpakatap og mini nga kwarta nga giingon nga gamiton unta alang sa pagpamalit og botó.  Mao na tingale kini ang alkontra sa mga kandidato niadtong awhag sa usa ka politiko nga “tunla ang paon, iluwa ang taga”.  Sa lawod sa piniliay, nasayod ang politiko nga adunay botante nga dili maantigo moila tali sa tinuod ug mini nga paon.  Mas marukoy diay ang politiko kay sa botante.  Fezteleern!