Ayaw’g kumpiyansa

Samtang nagkadaghan ang mga tawo nga nabakunahan og anti-COVID-19 vaccines, mikunhod na gyud ang mga natakboyan og virus.

Makapalipay kaayo ang mao nga kalamboan, apan kinahanglang dili lang gihapon kita mokumpiyansa, ilabi na kadtong wa pa mabakunahi.

Ang tinuod lang, kon bakunado ka na, dili na kaayo kita mobati og kahadlok kay mosantop man sa atong hunahuna nga kon matakdan, dili na kaayo grabe.

Busa kamong wa pa makapabakuna, ayaw kahadlok ug pabakuna na!

* * *

Kay menos na man karon ang tinakdanay sa COVID-19 sa Bohol, maayo tingali nga lugak-lugakan na sa Bohol Inter-Agency Task Force ang pamaagi pagsulod sa probinsya.

Maayo tingali nga dili na lang pangitaan og negative swab test results ang mga moadto sa Bohol, panid-an lang mga usa ka buwan.

Kinahanglan tingali nga ang vaccination certificate na lang maoy gamiton nga mora’g entry pass. Ang problema nila mao ang pag-verify kon dili ba peke ang “vax cert.”

Nindot tingali kini nga suwayan. Unya, pananglit mosaka pagbalik ang mga virus infection sa Bohol, diha-diha ibalik dayon ang estrikto nga pagpasulod.

Dinhi bitaw sa Sugbo, kon moadto ka sa bisan haing dapit sa kalungsuran, dili ka na pangitaan og negative swab test results.

* * *

Bana-bana nako, mora’g dili na mobalik si Mayor Edgar Labella sa katungdanan. Pero mas maayo hinoon nga ipiyal na lang niya ni Vice Mayor Michael Rama ang pagdumala sa siyudad.

Kon makabasa man si Mayor Labella niining akong lindog karon, tambag nako nimo mayor, pahuway aron nga paspas ang imong paglagsik.

Nasayod ko nga gusto ka gyud nga moserbisyo sa atong siyudad apan, unsaon man, naabtan man sa demalas. Ingon niana gyud ang kinabuhi.

Wa pa mahibawi-i kon kanus-a mobalik si Labella kay naghambin pa siya og sakit.

Nalipay na lang sab ko kay ang siyudad anaa sa maayong mga kamot kay nag-agi na si Rama nga mayor kaniadto.

Suheto na siya unsaon pagdumala ang siyudad. Apan tambag lang usab nako ni Rama nga kon duna ka na’y power to “hire and fire” og mga empliyado, ayaw sab iratsada nga ilisan nimo ang tanang tinudlo ni Labella.

Mahimo tingali nga ilisan kadtong mga ligoy, apan ang mga nagtrabaho, angay sila nga ipabilin sa katungdanan.

Tan-aw nako, usa kini sa nakapabalaka ni Labella nga kon siya magdugay sa iyang “leave of absence” basin og pangilisdan ni Rama ang iyang mga sakop.

 Anaa sa balaod nga ang usa ka acting mayor, kon magpabilin siya sa katungdanan sulod sa usa ka buwan, may gahum na siya nga maka-hire ug maka-fire og mga empliyado.