Wa magpa-second dose, way kaluoy

Makapahimangod! Atong gobiyerno nangutang og binilyon ka pesos aron lang ipalit og bakuna batok sa COVID 19. Tumong sa kagamhanan nga maprotektahan ang katawhan, makasalbar og kinabuhi sa tanang tawo, sa ilang kapanginabuhian ug mismo sa katumbahon na natong ekonomiya.

Apan unsa bay gibawos sa uban natong kaigsuonan?

Bisa’g hapit na lang moluhod atong mga lider, nagpakiluoy-awhag sa tanang hut-ong sa katilingban nga magpabakuna sanglit ania na ang abundang medisina sa atong nasod nga iindeksiyong libre aron kita mahibalik na sa naputol tang kahimtang kanhi, minilyong Pinoy gihapon ang wala magpatusok kay nangahadlok.

Angay untang ikalipay nga gumikan sa paningkamot ug iyaiyang gimik sa matag mayor sa nagkadaiyang siyudad, nadasig ang katawhan sa pagpabakuna. Apan sakit paminawon, nga may linibo na untang nakadawat sa first dose, pero wala na mobalik sa gikatakdang adlaw alang sa ilang second dose.

Sa siyudad lang sa Lapu-Lapu, sumala pa ni Local Vaccination Operations Center Deputy Officer James Sayson, may 3,000 kapin ka bakunado ang wala mopatim-aw didto sa nagpaabot nga vaccination site para sa ikaduha nilang pagpabakuna.

Pipila kanila, niadtong Hulyo ug Agosto pang naindyeksiyonan og first doze, pero motulo ka bulan na lang ang nakalabay, wala gyod sila moadto aron magpatusok sa pang-ikaduhang dose.

Angay hinumdoman. Ang bakuna may expiry time and date. Kon dili kini magamit sa gikatakdang oras ug petsa, dili na mapuslan. Ug ilabay na lang sa basurahan.

Unya, bisag naka-first dose na, pero mitulo ka bulan o lapas na nga wala magpa-inject para sa second dose ug sa maong gidugayon mao pay pagdesider nga magpabakuna, mamahimong wala nay kuwenta kadtong ilang unang pagpabakuna. Tungod kay matod pa ni Deputy Officer Sayson, mobalik na usab sila sa uno.

Pastilan, kaanugon sa panahon, aksiyon ug salaping gigahin sa atong gobiyerno nga imbes tabangan sa pagdaginot, giusik-usikan lang sa kaigsuonan tang wala magpa-second dose.

Hinuon, anaa pa gihapon sa vaccination site ang gireserbang second doze vaccines para niadtong wala pa mopatim-aw. May panahon pa nga ang kausik ning mga mahalong bakuna, mapugngan.

Unta, motungha ug magpa-second dose na sila. Kay kon dili, nagpaila lang, nga sila walay kaluoy sa salaping hinagoan natong mga magbubuhis.