Track record ni Sotto

Ang labing awahing resulta sa survey sa Pulse Asia nagmatuod nga inanay nang nahilis ang popularidad ni Presidente Rodrigo Duterte.

Human mag-una sa listahan sa mga posibling sunod nga bise presidente sa sayong mga surveys, karon gilupig si Duterte ni Senate President Vicente "Tito" Sotto III nga mitala og 25 porsiyento.

Duha ang posibling hinungdan niini. Una, nakaamgo na ang publiko nga pulos bulatik ray ilang makuha gikan ni Duterte.

Ikaduha, mas nituo sila sa katakos ug kaligdong ni Sotto pinaagi sa iyang track record sa Senado.

Sa unang posibling rason, dili na matago ni Duterte nga pulos yawit ug wa niya mabuhat  ang iyang pasalig.

Pananglit, iyang pasalig niadto nga bisan dyutay'ng pagduda sa pangurakot iyang tangtangon ang mga opisyal nga hingtungdan.

Apan dihang natribukar ang kontrobersiya sa posibling panagkonsabo sa mga opisyal sa gobyerno ug sa Pharmally pagtubag sa pandemya, mas gipili ni Duterte nga labanan ang mga opisyal nga nalambigit sa pasangil sa anomaliya.

Kini ug daghan pang mga pasalig ang iyang gipakyas nga posibling nakatampo sa pagkubos sa iyang rating.

Sa pikas bahin,  mas nakita sa publiko niining panahon sa krisis ang mga opisyal nga ilang kasaligan.

Ang track record ni Sotto isip pangulo sa Senado dako og natabang pagbira sa iyang rating.

Isip usa ka magbabalaod giila si Sotto nga usa sa mga outstanding performers sa Senado.

Bisan di siya abogado apan gidayeg siya sa mga abogado niyang kauban tungod sa iyang kalantip.

Mismong ang beterano nga si Juan Ponce Enrile midayeg sa kahanas ni Sotto sa mga lagda sa Senado.

Isip presidente sa Senado wala siya gidungog nga migamit sa katungdanan aron pagpanggukod sa mga kaatbang sa politika.

Ug ang usa sa mga maayo niyang hiyas isip sulogoon sa katawhan mao ang iyang dedikasyon sa trabaho.

Ang record sa Senado nagpakita nga si Sotto wala mahitabong nipalta og session ug bisan nauwahi man lang pagtambong.

Perfect ang iyang attendance sa Senado nga ang buot ipasabot di siya bolakbol sa trabaho.

Laing posibling hinungdan sa mas taas niya nga rating kay ni Duterte mao ang iyang koneksiyon sa showbiz.

Mas una siyang nailhan sa telebisyon ug sa mga pelikula.