Ang hulmigas

Pasakaan og kasong arson ang usa ka kanhi polis nga maoy gitumbok sa iyang mga silingan nga maoy nakaingon sa sunog nga nahitabo sa Sitio Labsalik, Labangon ning dakbayan sa Sugbo nga milamoy sa 80 ka balay.

Ang gipasanginlang kanhi polis nga gitanggong sa Labangon Police Station mao si Staff Sergeant Richard Sumalinog Tagadi-ad nga nadistino kaniadto sa lalawigan sa Sugbo.

Si Tagadi-ad gipasanginlan sa iyang mga silingan nga nagdaub sulod sa ikaduhang andana sa iyang balay nga maoy hinungdan sa sunog nga nahitabo.

Asoy sa iyang mga silingan nga nakita nila si Tagadi-ad nga nagbitbit og lighter ug sabog kuno sa ginadiling drugas nga nangita sa hulmigas kay iyang patyon tungod sa pagtuo nga patyon siya niini.

Dihang miulbo na ang kayo sa iyang balay nakit-an siya sa iyang mga silingan nga midagan paingon sa usa ka bakery diin siya namainit ug daw sama sa wala ray nahitabo nga sunog sa iyang balay.

Si Senior Fire Officer 1 Novo Erana, imbestigador sa Cebu City Fire Department miingon nga aduna silay tulo ka saksi nga mobarog batok sa suspetsado, apil na ang ig-agaw ni Tagadi-ad nga usa usab ka kanhi polis. Ang sunog nagbilin og usa ka P1.5 milyones nga danyos.

Nag-hallucinate o gimata-mata ang kanhi polis nga si Tagadi-ad. Ang hallucination usa sa mga epekto sa mga naggamit og ginadiling drugas. Ang uban gani gamay lang kasikas nga madunggan sa ilang kisami o atop magtuo na silang adunay gustong mopatay kanila. Mao ni ang testimonya sa akto nga kanhi drug recovery nga si Christopher De Leon.

Dili sa ingon nga akong gibasol ang mga nasunogan pero kun ila pa unta nga nasabtan ang epekto sa ginadili nga drugas ug gibantayan ang lihok sa ilang silingan seguro dili unta sila masunogan ug mawagtangan og mga panimalay.

Usahay, gikinahanglan usab ang pagpakabana sa bisan unsa ka gamay sa atong makita sa atong palibot.