Labella na-mild stroke?

Giawhag ni Davao City Mayor Sara Duterte-Carpio ang iyang mga political supporters nga suportahan ang tinguha sa iyang amahan nga gustong magpapili pagka bise presidente.

Gihimo niya kini sa usa ka panawagan nga gibutang sa official page ni Inday Sara diha sa social media, apan sa akong pakisusi nga gihimo, nangyamiid ang katawhan.

Bisan ang mga dumadapig sa politika ni Inday Sara nga maoy nangusog nga modagan siya pagka presidente atol sa eleksyon sunod tuig, miapil sa pagyamiid.

Akong gitimbang-timbang pag-ayo kining maong isyu, ug nakab-ot sa akong hunahuna nga husto ang baruganan sa mga dumadapig ni Inday Sara nga dili mopaluyo kang Digong.

Para kanako, kon ipadayon ni Presidente Duterte ang tinguha nga mag-bise presidente, maisip ra gyud nga hangol siya og posisyon.

Mahuman na karong Hunyo 30, 2022 ang unom ka tuig nga termino ni Presidente Duterte ug kon mag-bise presidente siya, wa na siya’y mahimo.

Kon lain na ang presidente, napanglantawan nako nga ang iyang gihimo karon kang Vice President Leni Robredo, mao usab ang himoon ngadto kaniya.

Tan-aw nako, mas nindot pa nga mosibog siya sa iyang tinguha nga magpapili pagka bise presidente, kay nianang paagiha, may posibilidad pa nga modagan si Inday Sara pagka presidente, ug kon modaog mahatagan pa siya’g katungdanan sa kagamhanan.

* * *

Gipahibawo sa anak ni Cebu City Mayor Edgar Labella nga nakasinati diay og “mild stroke” ang iyang amahan kaniadtong buwan sa Hunyo.

Nasagmuyo niini si Vice Mayor Michael Rama kay wa gyud kuno siya pahibaw-a nga andam man unta siya nga mobanos sa katungdanan pagdumala sa siyudad samtang wa ang mayor.

Sa milabay’ng pipila ka buwan, dili makontak si Mayor Labella ug usa ni sa rason nga si Rama, nasagmuyo kaayo niini. Bisan kami nga mga sakop sa media, gimingaw na sa mayor.

Ang akong “unsolicited advice” ngadto ni Mayor Labella nga giisip nako nga suod kaayong amigo, bisan og naa ra siya sa balay nagtrabaho, apan kinahanglang makontak usab siya sa media panagsa.

Mas nindot man gud kon ang kamandoan ug mga baruganan kabahin sa isyu nga naglambigit sa Cebu City Hall, gikan gyud sa iyang ba’ba.

Karon hinoon, matud sa iyang anak nga si Jaypee, 80 porsiyento na ang kaayohan sa iyang amahan. Salamat kaayo kay kini si Mayor Labella, buotan gyud kaayo.

Nahimo lang niya nga kontra ang ubang mga kauban niya sa grupo kaniadto tungod lang gyud sa politika. Apan human unya niini, sigurado ko nga mahibalik ra ang naandan nila nga panagsuod.