EDITORYAL - Bakuna sa senior citizens

Samtang nakaabot na og 15 porsiyento sa populasyon ang nabakunahan bisan sa unang dose ug ang uban kompleto, nangiwit gihapon ang Pilipinas sa pagpamakuna sa mga senior citizens niini.

Ang mga senior citizens ikaduha man unta sa priority groups sunod sa mga medical frontliners sa vaccination rollout sa gobiyerno, apan matud pa sa World Health Organization gamay lang kaayo sa mga senior citizens ang nabakunahan bisan sa unang dose.

Ang pamahayag ni Dr. Rabindra Abeyasinghe dungan kini sa iyang pagpahibalo nga duna pay 10 milyones ka doses nga gitagana ang COVAX Facility nga kaabag sa WHO alang sa Pilipinas.

Daw ang gustong ipasabot ni Abeyasinghe nga ning mosunod nga doses nga ipadala dinhi, unahon gyud unta ang mga senior citizens.

Unom na ka buwan sukad nga gisugdan ang pagpamakuna apan duna pay kapin sa 3 milyones ka mga senior citizen ang wala pa mabakunahi. Ang Pilipinas adunay 4.17 milyones ka senior citizens nga nakompleto na og bakuna samtang 3.47 milyones sab ang nakadawat na og ikaduhang dose. Importante kaayong protektahan ang maong sektor tungod kay gawas nila duna pay laing mga nagmasakiton. Samot nga nga dunay bangis nga Delta variant sa COVID-19.

Sa pagkakaron, daghan pa kaayong mga senior citizens dinhi sa Cebu City ang wala pa makadawat og bakuna. Ang uban tungod sa kabalaka gumikan sa mga nanggawas nga mga way siyentipikong basihan nga pagpangdaot bahin sa bakuna ug ang kawalay pagsalig nila sa gobiyerno karon.

Laing rason mao nga ang ubang senior citizens mahadlok mogawas sa ilang balay tungod kay basin mataptan na hinuon sila sa virus. Kung ang mga lokal nga kagamhanan mangusog lamang niining house-to-house vaccination, daghang senior citizens hasta ang mga masakiton nga mabakunahan.

Bisan mga nabakunahan na mataptan gihapon og COVID-19 ug kun sila makakuha niining maong sakit unya madala sa ilang mga panimalay nga dunay mga senior citizens ug masakiton, sigurado gyud silang matakdan sab. Maayo nalang kun duna silay bakuna.

Matud pa nga moabot na og 17.07 milyones ka Pilipino ang nabakunahan o 22 porsiyento sa populasyon sa nasud karon. Target sa gobiyerno nga bakunahan ang 70 milyones ka Pilipino karong tuiga.