Pasalig sa Megawide

Sa katapusan, miarangkada na gayud ang kontruksiyon alang sa bag-o ug world-class nga Carbon Market sa dakbayan sa Sugbo. Apan subo usab nga palangdungon nga bisan pa sa dakong benepisyo nga dala unya niining maong proyekto, adunay pipila nga gusto mohugawhugaw niini kay lagi daghan kuno nga mga nanginabuhi sa sulod sa maong merkado ang maalkanse. Klaro nga mabaw ug fake news kining maong mga pasangil. Daan nang gipasalig mismo sa kagamhanang lokal sa dakbayan ug sa kontraktor sa maong proyekto nga walay usa ka vendor sa Carbon Market ang mawad-an sa iyang panginabuhian. Gani, himoon pa silang prayoridad nga makanegosyo sulod sa merkado.

Ang Megawide, nga maoy mother company sa Cebu2World Development Inc. (C2W), adunay maayong rekord kabahin sa konstruksiyon sa mga dagkong inprastraktura sa nasud. Ug nakita niini nga dako ang panginahanglan sa Carbon Market nga mahimong moderno alang sa dugang pagserbisyo niini ngadto sa mga Sugboanon.

Gani, dinhi lamang sa Sugbo, ato nang nakita ang maayong kredibilidad sa Megawide. Kini pinaagi sa pagpalambo niini sa Mactan-Cebu International Airport (MCIA) nga karon adunay world-class nga terminal 2 nga gidumala usab sa Megawide.

Dili pa lamang dugay, mokabat sa 161 ka stall holder sa Freedom Park ug Warwick Barrack ang nakadawat og certificate gikan sa Megawide ug lokal nga kagamhanan. Sila temporaryo nga ibalhin ngadto sa market building nga adunay koneksiyon sa tubig, elektrisidad ug uban pa.

Mao nang dili gayud tinuod ang mga pasiatab sa pipila nga gatusan ang mawad-an sa ilang panginabuhian tungod sa modernisasyon sa Carbon Market ug nga dakong lugi ang dakbayan sa kontrata nga gisudlan niini uban sa Megawide. Ang ilang propaganda usa ka dako nga fake news.

Gani gitubag na ni Cebu City Councilor Raymond Garcia ang mga pasangil batok sa maong proyekto, lakip na ang pasangil sa taas unya nga rental fees. Matud ni Garcia nga nag-agi sa legal ug insakto nga proseso ang pag-aproba sa Konseho sa kontrata sa maong proyekto.

Daghan sa mga lider sa organisasyon sa mga vendor ang misuporta sa Carbon Market development. Ug angay lamang nga ato nang ilubong ang isyu batok niini alang sa daling kahumanan sa maong proyekto. Gani, mipasalig gayud ang Megawide nga magpabilin ang rental fees sulod sa tulo ka tuig. Kon aduna may kausaban hilabihan lamang kini ka gamay ug magkinahanglan usab og konsultasyon ug pagtugot sa lokal nga kagamhanan.