Kita ra ang mabasol

Mibalik na usab ang dakbayan sa Sugbo ug tibuok probinsiya sa Sugbo sa mas higpit nga quarantine status gumikan sa pagsaka na usab sa mga kaso sa makamatay nga coronavirus disease o COVID-19.

Sugod kagahapon hangtod sa Agosto 15, gipaubos sa nasyonal nga pangagamhanan ang Sugbo pagbalik sa modified enhanced community quarantine (MECQ). Kini basi usab sa rekomendasyon sa Inter-Agency Task Force on COVID-19.

Nakita sa kagamhanan nga paspas ang pagsaka sa mga kaso sa coronavirus sa Sugbo sa nakalabay’ng mga semana. Kini ilabina nga niabot na usab dinhi ang Delta variant sa COVID-19 nga giingon mas grabe pa ka mananakod.

Kay miligid pagbalik ngadto sa MECQ ang Sugbo, higpit na usab nga pagpatuman sa mga health protocol ang atong mapaabot. Daghang kapolisan ug kasundalohan ang atong makita nga magkatap na usab sa kadalanan.

Hinuon, dili nato mabasol ang kagamhanan niining pag-imposar na usab sa higpit nga health protocol dinhi. Alang kanila, mao lamang kini ang paagi pagkontra sa grabe nga pagkuyanap sa COVID-19 nga miiigo na og usa ug tunga sa milyon dinhi sa nasud.

Ang unang mabasol niini mao kita mismong mga lumulupyo. Dili ba nga daghan kanato ang sige nga nagpabaya pagtuman sa mga lagda batok sa coronavirus? Bisan gani ang simple nga paagi pagsul-ob og facemask gawas sa panimalay dili na nato tumanon.

Sa laing bahin, dili gyud malalis nga motikalbo na usab ang lokal nga ekonomiya niining pagbalik sa Sugbo sa MECQ. Daghan na usab ang mga negosyo nga motiyabaw niini gumikan sa grabe nga pagkalugi mugna sa partial nga operasyon.

Hinuon, dili gayud nato mapukan ang coronavirus disease kon walay kooperasyon sa matag usa. Mao nang ihikling una ang inyong mga pagbagulbol og tuman na lamang sa mga health protocol. Mao ra kini atong dag-anan batok sa COVID-19.