Balik na sad sa sinugdanan, hangtod kanus-a man?

Gituyok nako kagahapon ang mga dapit sa Metro Cebu nunot sa unang adlaw sa pagpatuman sa Modified Enhance Community Quarantine o MECQ apan murag wala may nausab, normal ang sitwasyon sa mga dapit ug ang panginabuhi sa mga tawo nagpadayon.

Wala usab kaayoy mga otoridad nga nagpatrolya. Bisan gani sa mga border control points naay duha ka pulis apan naglingkod lang sa daplin seguro kay wala man pud kaayo mga tawo nga nangagi.

Naay random checkpoint nga gipahigayon sa Highway Patrol Group 7 sa mga dapit apan dali ra usab kaayo nga igo lang nagpahinumdum sa mga tawo sa basic protocol aron malikay sa COVID-19.

Lahi kaayo kaniadto sa unang pagpatuman sa MECQ nga mora’g balaod militar ang mipatigbabaw. Apan karon luag ra man, para nako mas maayo man nga ipatigbabaw ang makatawhanon nga approach nga dili ipaagi sa inisog ang pagsita sa mga tawo.

Ang mga tawo nga nanggawas tanan seguro pulos imporantante ang tuyo ilabi na kadtong nanginabuhi. Busa dili ta kaingon nga nigawas sila kay mosuroy ra, murag wala nay luxury ang mga tawo ilabi na kadtong mga kabus.

Seguro kadtong mga datu nga naay mga nindot nga sakyanan ang manuroy sa mga dapit nga mag-enjoy sila. Apan kanang mga nag-motor average lang intawon ang estado sa kinabuhi nga dili gani kaigo ang kinitaan sa extra curricular activity ang kwarta.

Karon mas gipatigbabaw sa atong mga otoridad ug mismo sa mga lider sa LGU  ang pagsabot sa mga tawo kay kong pig-otan pa gud asa naman manguha intawon ang mga pobre sa ilang pagkaon nga wala namay ayuda?

Maayo lang moingon ang mga experto kuno nga gikinahanglan higpitan o i-lockdown ng mga dapit. Wala sila kuyapi? Maayo man sila kay daghan man kwarta nga bisan hangtod sa hangtod dili sila mogawas sa nindot nilang mga balay mahimo.

Tinuod naa na ang Delta variant sa atong dapit apan dili kini igong basehan nga patyon ang atong ekonomiya kay basin mauna pa og kamatay ang mga tawo sa gutom kay sa virus.

Mo duha na ka tuig nga nasinati nato kining pandemiya apan balik naman sad kita sa uno nga hadlokon lang apan dili naman mahadlok ang mga tawo kay mas nahadlok kong walay kan-on.

Usa ra ang sulbad niini nga dili na kita magsige og ECQ, MECQ ug ubang Q. Ug kini mao ra ang pagpalig-on sa health care system sa nasud, pagpalig-on sa panglawas. Kong hunahunaon, pirme ang kahadlok pastilan daghan ang mabuang dili tungod sa COVID-19 kondili tungod sa kagutom.