Ayaw ninyo sila’g kasuyai

Ang gihimo sa mga tawo nga nagtawag sa ilang grupo og “Ordinaryong Lungsoranon” nga nanghatag og bugas ngadto sa mga kabus, usa ka dalaygon kaayo nga lihok.

Dugay ra ko nga nagpaniid niining mao nga grupo nga gipangulohan ni Winley Dela Fuente kay kada weekend mosuroy sila sa kalungsoran ug manghatag og bugas sa mga kabus.

Ang grupo ni Winley nanghatag og bugas sa mga pobre, aron pagdasig ni Davao City Mayor Sara Duterte nga molansar kini pagka presidente.

Nadasig ko pag-interview ni Winley kay nakita nako nga talagsaon kining ilang gihimo. Nagtampo-tampo sila og kwarta aron ikapalit og bugas nga ilang ipanghatag sa mga kabus sa kalungsoran.

Gitug-anan ko ni Winley nga wa nila sundoga ang gihimo sa uban nga maghimo og rekorida sa mga sakyanan ug magbutang og placards kay dili kuno gusto si Inday Sara niini kay makamugna ra sila’g traffic.

Giingnan nila’s Inday Sara nga ang ilang pundo gamiton na lang sa pagpanghatag og bugas sa mga pobre, ug way pagsupak niini ang mayor sa Davao City.

Apan kaniadtong Sabado, gikasuyaan sila sa grupo nga naglaban usab og laing politiko nga gitan-aw nga magpapili usab pagka presidente.

Giatake pag-ayo ang social media page nilang Winley ug gisaway sa pagpanghatag nila’g bugas. Para nako, ayaw ninyo’g santaa kay wa man kana sila mangampanya kay wa pa man gani mohukom si Inday Sara nga molansar.

Ang maayo ninyong himoon nga mohimo usab kamo’g susama nga lakang aron daghan ang makapahimulos ug makadawat og bugas. Kon inyong sawayon ang grupo nilang Winley, samot na nga yam-iran nila ang gisuportahan ninyong kandidato.

* * *

Magpasalamat gyud ko kanunay sa kadagkoan sa Metro Cebu Water District (MCWD) kay paspas ang ilang pagpanghimo og dagkong “well” sa lainlaing dapit sa Metro Cebu aron magamit pag-supply og tubig sa katawhan. Daghan na nga mga dapit nga nagmugna og deep well ang MCWD, sama diha sa Cubacub, Mandaue City nga upat ka dapit gihimoan nila og “well” nga mo-supply  og tag 6,00 ka baril kada adlaw.

Si Edna Inocando nga maoy public relations manager sa MCWD miingon nga naghimo usab sila’g well sa Barangay Punta Princesa sa siyudad sa Sugbo, ug sa San Isidro, Talisay City.

Kabahin lang kini sa daghang proyekto nga gipasiugdahan ni MCWD Chairman Joey Daluz III atol sa iyang paglingkod sa pwesto.

Unya, samtang kami sa bukidway undang ang paghatod og tubig kanamo pinaagi sa mga trak sa MCWD. Kaniadto, sus, matagbaw tawon mi’g hakot og tubig kay hubas ang among mga gripo.

Salamat sa maayong pagdumala mga opisyal sa MCWD!