Fully vaccinated namatay gihapon

Sa pagsulat niini, bag-o lang mitawag pinaagi sa landline phone ang higala kong ‘5-6 financier,’ kinsa naigo sab ang pamilya sa COVID-19 pipila ka bulan na ang nakalabay. Hasta iyang pinanggang anak nga nurse, kinsa nagtrabaho sa prestihosong ospital, wala makaipsot. Nataptan sab! Hinuon, salamat sa Diyos, nakarekober na sila tanan.

Gipaambit sa akong amigong pinanser, unsa kapait, kakulba-hinam ang kasinatiang ilang naagian dihang naigo sila sa COVID-19. Pun-an pa, nga na-mild stroke siya. Pastilan, labihan kunong kutasa sa mga pagsulay nga ilang gitungas. Samot, nga wala na kunoy klaro iyang negosyo. Haskang kalbaryoha!

Unya, gisingit niya’g hisgot ang nahitabo sa kailang magpapatigayon, kinsa tibuok pamilya gipang-COVID sab bisag nabakunahan na. Ang amahang fully vaccinated na, mikompiyansa dayon. Kon maoy magbantay sa ilang tindahan, dili na mag-face mask. Wala nay face shield. No more social distancing.

Pero paglabay sa duha ka bulan, natakboyan gihapog COVID-19 ug namatay. Ang mga anak nangatakdan sab. Bisan kadtong natarokan nag 1st dose. Hinuon, wala magrabihi.  Nakaipsot!

Busa, higpit na gyud gituman sa nahabiling tibuok pamilya ang tanang health protocols bisag na-fully vaccinated na sila.

Base sa datos sa DOH, ang positive rate sa COVID-19 cases dinhi sa Sugbo, masiyudad man o kalungsoran, nagsige na pod pagsaka kada adlaw. Kini tungod kay ang mga tawo, kinsa bisan nasayod unsa ka mananakod ang COVID-19, wala na giseryoso ang pagtuman sa importante kaayong health protocols.

Daplin sa kadalanan, may mga lalaking magpabuhot og sigarilyo samtang namaligya. Sulod sa mga modernong jeepney, usahay maghuot ang mga pasahero, ang uban magbarog na lang kay wala nay kalingkoran. Kini sumala pa sa usa ka concened citizen nga nagsunod ning atong lindog, kinsa nakasaksi gyod ning maong gil-as kaayong situwasiyon.

Matud niya: “Jav, banati, bi!” Bitaw, hangyo lang sa atong kaigsoonang Sugboanon ug mga dayohan dinhi sa Sugbo. Mahimo bang makat-on na kita sa pagdisiplina sa atong kaugalingon? Mahimo bang sundon nato ang health protocols bisag walay mga mananakop nga magbantay?

Abi ninyo, niini lang paagiha nga mapakita nato ang atong gugma ngadto sa atong isig ka tawo. Ug segurado ko, nga ikalipay kini sa atong Ginoo, kinsa maoy atong dangpanan sa tanang kalisdanan.